Irurtzungo Emakumeen Taldeak, Kultur Kontseiluaren eta Irurtzungo Udalaren laguntzaz, emakumearen egunaren inguruan egitarau zabala prestatu du. Egitaraua gaur bertan abiatuko da. Gonbite batekin abiatu ere. Jardunaldien antolatzaileek astelehenero, 20:00etan, Iruñeko Gaztelu Plazan izaten den Astelehen Lilak elkarretaratzean parte hartzera deitu dituzte irurtzundarrak. Ordu laurden irauten duten kontzentrazio horietan sexu-indarkeria eta emakumeen hilketak gaitzetsi eta babesa eta prebentzioaren aldeko aldarrikapena egiten da. Iruñera joateko hitzordua 19:00etan jarri dute, Irurtzungo plazan. Emakumeari buruzko XVI. Jardunaldien hurrengo hitzordua ostegunean izanen da. Mari Carmen Lopezek Los timos y engaños más comunes izeneko hitzaldia eskainiko du San Martín jubilatuen elkartean. 17:30ean izanen da. Jardunaldien egitarauak, bestalde, martxoaren 15era arte iraunen du.