Ingurumen Ministerioak Irurtzungo Udalari jakinarazi dio Artadiko tunela ez duela berrituko, eta ur ekarriaren hodia mendiaren zeharraldetik eramanen dela. Ministerioak ere jakinarazi du lanaren egitasmoa Proitec enpresari eman diola. Ingurumen Ministerioak tunelaren konponketa baztertu egin du, garestiegia delako. Plazaolako trenbidea bide berde izendapena duenez, hura garatzean hartzen diren erabakien zain geldituko da, beraz, tunelaren konponketa. Ingurumen Ministerioak bere gain hartu du ur ekarriaren ibilbidearen moldaketa, hala jaso zelako iazko estatuko aurrekontuetan, NaBaik aurkeztutako mozio bategatik. 275.000 euroko diru saila zegoen aurreikusita, baina tunelaren konponketak 805.464,63 euroko aurrekontua zuen.