Asteburu bete festa

Musika, jan-edanak eta konpainia ederra. Horrekin nahikoa da festa ospatzeko. Eta horrelako ezer ez da faltako Irurtzunen asteburuan. Haurrendako eskaintza, erraldoien eta buruhandien konpartsaren urteko azken irteera, gozogintza lehiaketa, bazkari-afariak, dantzaldiak, karta lehiaketak eta beste. Halako eskaintzarekin osatu dute egitaraua Irurtzungo Kultur Kontseiluak eta udalak. Gainera, igandean, 27 artisau bilduko dituen azoka izanen da.

San Martin patroiari eskainitako festak ospatuko dira Irurtzunen asteburuan. Garai batean herriko festak azaroaren 11ren bueltan ospatzen ziren baina eguraldiagatik eta gizartean izandako aldaketengatik irurtzundarrek festak Trinitatera aldatu zituzten. Ondorengo aldaketa batek festak garileko 3. asteazkenean hastea finkatu zuen. Hala, Irurtzungo egutegia festez zipriztinduta gelditu da.

Egitaraua
Azaroak 10, larunbata
17:30ean 3ZP4 ikuskizuna kiroldegian. Antolatzailea: Pikuxar euskal txokoa.
18:30ean Gozogintza txapelketa eta dastatzea. Gozoak Erga Larrea elkartean 18:00etan aurkeztu behar dira.
19:00etatik 22:00etara Dantzaldia Ken Bat taldearekin.
23:30ean Gazte music dj-k, barazki gunean.

Azaroak 11, igandea
10:00etan Dianak.
10:30etik 14:30era Artisautza azoka.
11:30ean Erraldoien eta buruhandien konpartsaren kalejira.
13:00etan Zozketa, bi txerrikume, jubilatu elkartean.
14:15ean Jubilatuen bazkaria. Ondoren dantzaldia.
16:30ean Mus txapelketa Iratxo elkartean. 16:00etan zabalduko da izen ematea.
18:00etatik 20:00etara Xaibor disko-festa.
19:00etan Haurrendako txokolate-jana.
20:15ean Zezensuzkoa.