Maiatzean jokatuko dira La Peluso probak

Maiatzaren 13an, larunbata, martxa zikloturista izanen da eta maiatzaren 21ean, igandea, Taldekako Erlojupekoa izanen da. Izena ematea ilbeltzaren 1ean irekiko dute, eta tokia ziurtatzea lehenbailehen ematea ahokatu dute. 

Irurtzun Taldea Kirol Elkarteak 2023ko La Peluso txirrindularitza probak antolatzeko makineria guztia martxan du eta izena ematea 2023ko ilbeltzaren 1ean zabalik dagoela jakinarazi du La Pelusoren arima den Santi Moreno Moreno irurtzundarrak. 

Aurten, 2022 urtean, 1.500 txirrindularik hartu zuten parte II. La Peluso Zikloturista Martxan, arrakasta itzela, eta estreinezkoz antolatutako I. La Peluso taldekako erlojupekoak ere harrera polita izan zuen, 18 taldek hartu baitzuten parte. Bi proba hauek segida izango dute 2023ean, eta baita La Peluso BTT Xtreme mendi txirrindularitza probak ere. 

Antolakuntzatik azaldu dutenez, maiatzaren 13an jokatuko da III. La Peluso Zikloturista Martxa. Ohi denez, txirrindulariek bi ibilbide izango dituzte aukeran, bata luzea eta bestea laburragoa. Maiatzaren 21ean, aldiz, taldekako erlojupekoaren txanda izango da. Parte hartzea handia izango dela aurreikusten denez, izena ematea lehenbailehen egitea aholkatu du antolakuntzak, Rockthesport webgunean. Halaber, lasterketarako Bio Racer etxearekin maillot ederra diseinatu du La Pelusok, izena ematerakoan erosi ahal izango dena. 

Omenaldia
La Pelusok gaineratu duenez, aurten 1984ko Reynolds taldeko txirrindulari ohiak omenduko dituzte.