Nafarroako Gobernuko Etxebizitza Zuzendaritza Nagusiak herrialdean barna hainbat saio antolatu ditu. Horietan erabilera lagapeneko Etxebizitza Kooperatiben Bultzada Publikorako Plan Estrategikoa azaltzen ari zaie udal ordezkariei eta bestelako eragileei. Irurtzungo kultur etxeak halako saio bat hartu zuen garagartzaroaren 17an. Orain arte Etxebizitza Zuzendaritza Nagusia hainbat lurralde erakunderekin aritu da lanean, hala nola garapen-agentziekin, tokiko ekintza-taldeekin bizitegi-eredu horren ezaugarriak helarazteko eta beren eragin-eremuko pertsonei oinarrizko informazioa emateko.
Erabilera lagatzeko elkarlaneko etxebizitza Europako zenbait herrialdetan dagoeneko finkatuta dagoen bizitegi eredu bat da, etxebizitza bat eskuratzea errazten duena eta etxebizitza horien eskuragarritasun iraunkorra bermatzen duena. Eredu horrek oinarrizko bi ezaugarri ditu, beste etxebizitza kooperatibo mota batetik bereizten dutenak eta, gainera, espekulazioa saihesten dutenak: jabetza kolektiboa eta kooperatibek duten erabilera eskubidea.
Topaketa horiek, Etxebizitza Zuzendaritza Nagusiak erabilera-lagapeneko elkarlaneko etxebizitzak arautzeko duen asmoaren berri emateaz gain, eredu hori zabal dezaketen lurralde bakoitzeko erreferentziazko pertsonekin harremanetan jartzeko balio izan dute, hainbat saioren bidez edo Nafarroako Gobernua arlo horretan egiten ari den lanaren transmisioaren bidez.