Osasuna Magna Xotako kapitain Roberto Martilek areto futbol jokalari izateari utziko diola iragarri du. Denboraldia bukatuta zintzilikatuko ditu areto futbol zapatilak. Jokalari irurtzundarrak 20 denboraldi egin ditu aktibo, eta gaur egun 538 partida ofizial jokatuak ditu herriko “bere” taldean, Xotan, areto futboleko mailarik gorenean, lehen mailan.
Kapitain irurtzundarrak 38 urte bete zituen otsailaren 24an eta 6 urte zituela hasi zen Xotan. 15 urterekin talde nagusiaren deia jaso zuen eta Imanol Arregi entrenatzailearen aginduetara entrenatzen hasi zen. 2005Ean debutatu zuen partida ofizial batean, Azkar Lugoren kontra. 2006-2007 denboraldian utzita jokatu zuen Playas de Saloun eta Zalatamborren. 2007. urtean talde nagusiko baja bat betetzeko deitu zuen Imanolek, eta ordutik Xotako talde nagusiko ezinbesteko jokalaria da. 2008An Espainiako kopako lehen partida jokatu zuen.
Dena ez da poza eta ospakizuna izan. 2023. urtean lesio gogorra izan zuen, eta taldera bueltatzeko gai izan zitekeen zalantzan egon zen, baina lan erraldoia egin eta gero, ongi errekuperatu eta Osasuna Magna Xota gidatzen jarraitzen du Irurtzungo lemazainak. Lesionatuta zegoen bitartean bigarren entrenatzailea izan zen Xotan, eta aldi berean Xotako emakumezkoen talde nagusiko entrenatzailea da.
Oso eskertuta
Martxoaren 26an jakinarazi du areto futbolari izateari utziko diola. “Ibilbide zoragarria izan da, 6 urte nituela Irurtzunen jokatzen hasi zena. Ez nuen inoiz pentsatuko iritsi naizen tokira iritsiko nintzenik. Harmailetan taldea animatzetik Eseverri, Afranio eta Gascon bezalako jokalariekin jokatzera pasa nintzen. Sekulakoa” azaldu du Martilek, Xotak zabaldu duen bideo batean.
Ibilbidea izan du gogoan. “Ametsetan ere ez nuen pentsatuko bizi izan dudan guztia lortuko nuenik. Zenbat partida eta bizipen, Espainiako Kopak jokatzea, play-offak, ligako final bat... Agian tituluren bat lortzearen ginga falta izan zaigu, zeinen gertu egon zen Errege Kopako final hura...”.
Roberto Martil: “Ametsetan ere ez nuen pentsatuko bizi izan dudan guztia lortuko nuenik. Zenbat partida eta bizipen...
Kirolaren alde gogorrena ere gogoratu du. “Gehienetan kirol honen alderik politena bizi izan dut, baita porrot gogorrak, hiru egun negarrez egoteko horiek, eta lesioak. Litekeena da lotailu gurutzatu horrek bizitza aldatu izana, baina ziurrenik onerako izaten bukatuko du”.
Azkenik, eskerrak eman ditu. “Eskerrik asko urte luze hauetan nire alboan egon zaretenak: taldekideak, arerioak, arbitroak, entrenatzaileak, lagunak, familia... Baita zaleak ere. Eskerrik asko ni animatzeagatik eta zuen kariñoa erakusteagatik, une onetan eta baita une txarrenetan ere. Anaitasuna berriz goraino betetzeko helburua dut, ea lortzen dugun. Oraindik gauza handiak ditugu egiteko”.
Taldekideei keinua egin die. “Zuekin bizitakoa, lagunok, guk dakigu soilik. Guztiekin gogoratzen naiz, baina batzuk betirako bereziak izango zarete”.
Azken hitzak areto futbolarendako izan dira. “Eskerrik asko horrenbeste emateagatik. Elkar zaintzen eta disfrutatzen jarrai dezagun espero dut”.
