Ion Cerviño Pueyo eta Xota adostasunera iritsi dira eta jokalari irurtzundarrak beste bi urterako sinatu du klub irurtzundarrarekin, 2027ra arte. “Oso pozik nago etxean 2027ra arte egoteagatik, eta taldearekin esperientzia handia pilatzen jarraitzeagatik” azaldu du jokalariak Xotaren webgunean egindako adierazpenetan. Xotan izandako ibilbide guztiarekin oso eskertuta azaldu da Cerviño.
Joan zen urtean bigarren mailako Ejido taldean jokatu zuen, utzita. “Urte zaila izan zen, uste dut ni ez nengoela guztiz ongi. Denboraldia ez nuen ongi hasi, ez nituen emaitzak ikusten. Uste nuen aldaketa bat ongi etorriko zitzaidala, eta beste talde batean jokatzeko erabakia hartu nuen. Ejidora joateak on egin zidala uste dut, zoriontsu itzuli naizelako eta etxean dudana gehiago baloratzen dudalako. Aurten aurretik ez nuen konfiantzarekin hasi dut denboraldia, eta nik ikusi nahi dudan Ion ikusten ari da pistan”.
Osasuna Magna Xotaren aurtengo erronka play-offetan sailkatzea da, ligako lehen zortzi postuetan. “Helburu argia da guretako. Taldean konfiantza handia dugu, eta badakigu bukaerara arte borrokatuko dugula. Play-offetan egoteko erronka lortzea espero dugu, zaleei opari hori egin ahal izateko”.