Nafarroako Gobernuaren menpe dagoen Enpresa eta Berrikuntza Zentro Europarra (CEIN) sozietate publikoak eta Sakanako Garapen Agentziak lankidetza hitzarmena sinatu zuen maiatzaren 7an. Horren bidez ibarrean ekintzailetza sustatu nahi da. Aldi berean, CEINen ekosistemako ekintzaileek Dinabideren instalazioak erabili ahal izango dituzte, eta, gainera, bi erakundeek elkarrekin prestakuntza programak eginen dituzte.
Akordioak Uxue Itoiz CEINeko zuzendari kudeatzailearen eta Aitor Larraza Sakana Garapen Agentziako lehendakariaren sinadura du. Dinabiden bertan sinatu zen akordioa eta aukera baliatu zen CEINen dauden startupetako kideek bertatik bertara ezagutu ahal izan zituzten zentroak dituen instalazioak, eta eskaintzen dituen aukerak.
Itoizek nabarmendu zuenez, "Sakanako Garapen Agentzia dagoeneko egiten ari zen ekintzailetzaren sustapena, eta lankidetza hitzarmen honen sinadurarekin, indartu egin da". Itoizek gaineratu zuenez, "Dinabide erreferentziazko hub teknologiko bihurtu da Nafarroan, eta CEINen startupek lehia-abantaila handia izango dute, instalazioak erabili ahal izango baitituzte".
Bestalde, Aitor Larraza Carrera Sakana Garapen Agentziako presidenteak adierazi zuenez, "akordio honen bidez, CEINek lurraldean duen jarduera indartzen du eta Sakanako ekintzailetza teknologikoari laguntza handiagoa ematen zaio. Ekintzailetza mota hori berrikuntza bektore bat da egungo industrian, eta, beraz, funtsezkoa da Sakanako industria suspertzeko".
Hitzarmenak ia bi urteko indarraldia du, eta aukera emango die ekintzaileei eta enpresei azpiegitura eta ekipamendu teknologiko aurreratuak eskuratzeko. Gainera, teknologia aurreratuei buruzko prestakuntza eta mentoretzako programa bateratuak garatuko dira, eta I+G+Bko lankidetza-proiektuak bultzatuko dira manufaktura aurreratuaren eta ekonomia zirkularraren esparruan. Azkenik, Nafarroako sektore estrategikoetan enpresa-ekimen berriak sortzea sustatuko da. Dinabide, gainera, IRIS Nafarroako berrikuntza digitaleko poloko bazkidea da, eta fabrikazio gehigarriarekin eta manufaktura aurreratuarekin lotutako ekipamenduaren zati bat hartzen du.
Dinabidez
2020an Irurtzunen ireki zenetik, DINABIDE eskualdeko ekimen batetik eskualdeko erreferente batera aldatu da fabrikazio gehigarriko eta manufaktura aurreratuko teknologietan. Bere ikuspegi integralak teknologia berrien eraginari buruzko sentsibilizazioa, prestakuntza espezializatua eta irtenbide teknologikoak ezartzen laguntzea uztartzen ditu, lankidetzan eta barne-gaitasunen garapenean oinarritutako enpresa-kultura sustatuz.
Zentroa Sakanako Garapen Agentziak koordinatzen du. Sakanako Mankomunitatearen % 100eko partaidetza duen erakunde publikoa da, eta Sakanako Eskualdeko garapen sozioekonomikoa sustatzea du helburu. Bere egitekoen artean Sakanako Plan Estrategikoaren inplementazio eta jarraipenerako erreferentziazko erakundea izatea dago.
CEINez
Nafarroako Enpresen eta Berrikuntzaren Europako Zentroa (CEIN) sozietate publikoa, Industria Sailaren eta Trantsizio ekologiko eta digital enpresarialaren mende dagoena, erreferentzia da ekintzailetzaren arloan 1988tik. Programa horiek startup teknologikoak sortzeko, sendotzeko eta eskalatzeko baliabide eta zerbitzu espezializatuak eskaintzen dituzte, eraldaketa digitaleko prozesuan dauden enpresa industrialen beharrekin bat etorriz.