Trail running-a egun, modan dagoen kirol bat da. Naturan egiten den lasterketa gisa definitzen da; mendian, basamortuan, basoan, lautadan… egin daitekeena. Luzera desberdinetako lasterketak prestatzen dira, 42km baino gutxiagokoek Trail izena hartuz, eta 42km-tik gorako lasterketek Ultra Trail izena hartuz.
Kirol honen berezitasun fisiologikoak direla eta, nutrizioa izan daiteke lehiaketa edo espedizioan aldaketa markatu dezakeen faktore garrantzitsuenetako bat. Nutrizio praktika desegoki batek arriskuan jar ditzake ondo entrenatutako mendiko kirolariak. Garrantzitsua izango da, beraz, fisikoki ongi entrenatuta egoteaz aparte, nutrizioaren esparruari tartetxo bat eskaintzea; osasun egoera ona, kirol errendimendu hobea eta errekuperazio ona bermatzeko, eta kirolaren berezko patologia jakin batzuk izatea saihesteko.
Mendiko kirolarien nutrizio arriskuei dagokienez, gorputzeko erregaia agortzea, deshidratatzea eta hiponatremia arriskua, urdail hesteetako arazoak, altitudearekin lotutako arazoak eta altuera txarra dira. Nutrizioa aliatu gisa, ebidentzia zientifikoan oinarritutako estrategia dietetiko eta suplementazioaren diseinu egokia, kirolariaren testuingurura egokitua, eta nutrizio entrenamendu egokia dira osasuna eta kirol errendimendua bermatzeko giltzarria. Hau guztia dela eta, estrategia nutrizionalak ongi finkatuta egon behar du.
Berez, probak 1 eta 2,5 ordu artean irauten badu, orduero 30-60g karbohidrato hartzea gomendatzen da, eta proba luzeagoa bada, orduero 90g karbohidratokoa. Proteinei dagokienez, gehienbat proba ondoren hartuko dute garrantzia, muskuluaren errekuperazioan lagunduko baitute. Kirol saioaren ondoren hartzeko adibidea; jogurta, proteina hautsa, fruta eta oloarekin izan daiteke.
Amaitzeko, hidratazioa izango da ere asko zaindu beharreko aspektua. Lasterketarekin hasi aurretik, garrantzitsua izango da ongi hidratatuta egotea. Proba bitartean, orduero 0.4-0.8 l hartzea gomendatzen da, eta saioa amaitzean, oso garrantzitsua izango da proba bitartean galdutako pisua ur litrotan errekuperatzea, 1.2-1.5 l/kg hain zuzen ere.
