Badira bost urte ekialdetik berri harrigarriak iristen hasi zirela. Hiri bat erabat isolatua, birusa, hildakoak, musukoak… Eta ia ohartu gabe, Italian zegoen ditxosozko birusa, eta handik gutxira, hemen.
Ezer ulertu gabe, guztiok konfinaturik, eta jakin gabe egoerak zenbat iraunen zuen, nola aterako ginen ataka horretatik…
Ederki sufrituta eta hildako asko tarteko, egoera horretatik atera ginen eta nik uste, ulertu genuela zeinen garrantzitsua den Osasun Sistema Publiko sendo bat izatea, eta handik aurrerako gizartearen helburu nagusietako bat hura izan behar zela, hots, Osasun Sistema babestea eta behar bezala hornitzea, giza baliabidez eta bestelako baliabidez ere bai. Eta geroztik, horretan gabiltza, baina sistema bere onera etortzea erabat lortu gabe.
Orain, berri harrigarriak mendabaldetik datozkigu. Ero baten bat bateko burutazioak ziruditen; Mexikoko golkoari izena aldatuko ziola, Groenlandia eta Kanada bereganatuko zituela, bakea Ukrainian eta Gazan ezarrikoa zuela epe motz batean…
Baina AEBko presidentea asmo horiek egi bihurtzeko lanean ari dela ikustean eta horretarako edozein bide egokia iruditzen zaiola. Adibidez, agindutako bakeak lortzeko arrazoiak, bere interes ekonomikoak besterik ez direla edo giza eskubideekiko erabateko errespetu falta ikustean, hasieran ematen zuena baina askoz larriagoa dela ulertu dugu.
Berak erabakitakoak bertan geldituko balira eta Europan, distantziak ematen duen lasaitasunarekin ikusiko bagenitu… baina ez da horrela, eta beraien eragina ere iritsi da. Europan, jada, erabakia da armadak hornitzea, hurrengo urteotan, dirutza xahutuko duela.
Honela, Europak hobe luke zoro baten ekinaldiari jarraitu edo erantzun beharrean bere barneko kohesioa edo sendotasuna bilatzea printzipioak eta baloreak oinarri hartuta.