Azken garai honetan Espainiako Telebistan egin dituzten aldaketak kontuan harturik, berriz ere hasi naiz zenbait saio ikusten, albisteen eta eztabaiden saioak bereziki.
Denbora asko neraman Estatuko Telebista Orotarikoetara hurbildu gabe, edo denak alde berera lerratuak daudelako edo bulo baldarrak direla onartzen duten arren, horiekin aurrera joaten direlako lotsarik gabe.
Hala eta guztiz ere, azken aldi honetan Espainiako Telebista katean gauzak aldatzen ari direla ematen du eta berriz ere hurbildu naiz bere informatiboetara. Gauzak asko aldatu dira katean: kazetari hobeak, albisteak eta iritzia ongi kudeatzen dituztenak, eta saio interesgarriak. Halere, oraindik gainditu gabeko irakasgai bat gelditzen zaiela iruditzen zait. Izan ere, Telenavarrarena.
Horrenbeste saio dinamikoen artean, Telenavarraren saioa zurruna eta, euskarari dagokionez, errespetu gutxikoa iruditzen zait. 40 urte edo pasa dira Telenortetik Telenavarrara pasa ginenetik eta oraindik ez dugu inoiz ere ikusi euskaraz aritzen den lagunaren aurpegia. Lotsatzen da euskaraz egiteagatik? Eguraldia aurkezteko emakume bat agertzen da, “Arin arin” (gidoirik gabeko) saioan, inor ere ez. Saio osoak 25 minutu irauten badu, euskaraz 2,5 minututara ez da ailegatzen. Lerroburuak aurkezten galtzen dutena baino gutxiago. Agian, saioari izenburua aldatu beharko liokete eta, euskarari dagokionez gehiegi mugitu ez direla ikusirik, “Arin-arin” ordez, “Mantso-mantso” edo “Geldi-geldi” izendatu.