Eduki hau partekatzeko esteka arbelera kopiatu da.
Igande eguerdian jokatu zen 22 urtez azpiko afizionatuen Nafarroako Buruz Buruko txapelketaren finala. Aurrez aurre, txapelketan bikain aritu diren bi pilotari: San Migel taldean dabilen Lizarrako Arkaitz Peñas eta Irurtzungo taldean jokatzen duen Aitor Etxeberria lakuntzarra. Bi pilotariak pareko hasi ziren: pilotariek sentsazio onak zituzten eta ez zegoen dominatzaile argirik. Baina Peñasek une erabakiorrean arriskatu zuen eta ongi atera zitzaion: bi dejada, bi tanto bi paretetara, Etxeberriaren akats batek eta sakez lortutako hiru tantori esker, 8 tantoko partziala lortu zuen Lizarrakoak, markagailua 11-4an ezarriz. Baina segidan bi tanto eskuratu zituen Lakuntzakoak eta finalerdietan burutu zuen erremontada ikusgarria errepikatuko zuela pasa zitzaien burutik pilotazaleei (gogoratu 11-3 galtzen zioala orduan eta azkenean irabazi zuela), Etxeberriak ez baitzuen amore eman. Nahiz eta 14-6 galtzen joan Etxeberriak borrokatzen jarraitzen zuen. Dejada bat egin eta ongi atera zitzaion, baina ez hurrengoa. Peñasek dejada bat eta sakezko bi tanto lortu eta horrela despeditu zen partida, 18-7 Peñasen alde. Lakuntzakoa 22 urtez azpiko Nafarroako Buruz Buruko txapeldunordea izan da, lan bikaina eginda.