Sakandarrak XVI. Sakanako Herri Lasterketan (8 km)
Absolutua, gizonezkoak
1.Aitor Etxeberria (Iruña): 26:16
4.Alberto Martinez (Lak): 27:37
5.Raul Audikana (Olaz): 28:10
7.Sergio Garcia de Eulate (Alts): 28:49
8.Iraitz Senar (Lak): 29:13
11.Javier Borrega (Alts): 29:35
13.Iñaki Alvaro (Alts): 30:03
15.Francisco Gomez (Alts): 30:28
16.Iban Sobredo (Alts): 30:28
17.Andoni Azanza (Alts): 30:28
22.Jose Ignacio Mikeo (Lak) 31:09
23.Aitor Mozo (Lak): 31:19
32.Oihan Soto (Lak): 33:28
33.Ander Orabengoa (Olaz): 33:43
34.Ekain Alegre (Alts): 33:43
35.Santi Agirre (Iturm): 33:44
36.Juan Martinez del Olmo (Alts): 34:03
45.Aingeru Azazeta (Alts): 36:09
51.Josean Lizarraga (Iturm): 37:50
52.Manuel Larraza (Etx): 38:16
53.Amets Artieda (Etx): 38:23
56.Fco. Manuel Campos (Etx): 38:38
64.Joxemari Mercero (Unanu): 41:59
Emakumezkoak
1.Izaskun Beunza (Olaz): 31:46
4.Ginesa Lopez (Alts): 33:14
8.Mari Gwen Davies (Urd): 37:06
10.Silvia Perez (Alts): 38:27
12.Maite Zabaleta (Etx): 40:32
14.Iosune Senar (Etx): 41:59
15.Marina Zabala (Lak): 42:05
Kadeteak
1.Iker Mintegi (Alts): 19:15
2.Eki Olabide (Alts): 20:59
3.Martxel Etxeberria (Iturm): 21:00
4.Inhar Olabide (Alts): 21:04
5.Jon Erdozia (Etx): 21:37
Lakuntzan jokatu zen, larunbatean, XVI. Sakanako Herri Lasterketa-La Burundesa Sari Nagusia. Mank-ek antolatu zuen, Lakuntzako Zabalarte klubaren, Dantzaleku Sakana klubaren, Lakuntzako Pertza elkartearen eta Lakuntzako Udalaren laguntzarekin. Burundesa izan zen babesle nagusia, Sakana koop fundizioa, Sakana Laser eta Lacunza Kalor Group enpresekin batera.
Lehenik eta behin kategoria txikikoen probak jokatu ziren. 135 neska mutiko lehiatu ziren aurrebenjamin mailatik haurren mailaraino, lagunen, senitartekoen eta Lakuntzako herritarren txalo artean. Bukaeran, ogitartekoa eta edaria jaso zuten guztiek. Ondoren, 18:00etan, Sakanako Herri Lasterketari ekin zitzaion. Proba Sakanako Atletismo Kopa-Lasa Kirolak Sarirako baliagarria zen.
Herrian barna prestatutako 3 km-ko zirkuitu bati bi itzuli egin ondoren, 2 km-ko zirkuitu bat osatuz despeditu zuten proba XVI. Sakanako Herri Lasterketan irteera hartu zuten 71 korrikalariek, guztira 8 km osatuz. Jubenilak eta kadeteak ere bertan aritu ziren, baina kadeteek 5 km osatu zituzten, zirkuitu handiari buelta bat eta txikiari beste bat emanez.
Prestatutako zirkuitua “oso azkarra” zela esana zuten Zabalarte klubekoek, eta hala izan zen. Lehendabiziko itzulian lau korrikalariz osatutako multzoa kokatu zen aurrean, baina hurrengo bueltarako taldea desegiten hasi zen. Abarrategi kaletik plazaraino dagoen aldapatxoa igota zegoen helmuga, eta arnasestuka iritsi zen, bakarrik, Aitor Etxeberria iruindarra (26:16). 27 segundo atera zizkion Pedro Ruiz murtziarrari eta 37 segundo Ilunberriko Oscar Primori. Alberto Martinez lakuntzarra laugarrena sartu zen (27:37) eta bera izan zen lehen sakandarra. Kadeteetan (5 km) Iker Mintegi altsasuarra izan zen azkarrena (19:15).
Emakumezkoei dagokionez, Izaskun Beunza olaztiarrak eta Ibarrako Maialen Muñozek lehia oso estua izan zuten, parean izan baitziren lasterketa guztian, baina, azkenean, Beunza izan zen txapelduna (31:46) eta 10 segundo atera zizkion Muñozi (31:46). Mañeruko Rebecca Peña sartu zen hirugarrena (32:54).
Osasun Martxan 35 parte-hartzaile
Proba nagusiko korrikalariekin batera, 35 pertsona abiatu ziren irteera puntutik, Osasun Martxa burutzeko asmoz. Korrikan hasi berriak direnei eta lasterketan beste modu batean parte hartu nahi dutenei begira antolatu zen proba. Zirkuitu handiari buelta bat ematea zen kontua (3 km). Batzuk korrika osatu zuten Osasun Martxa, eta askok oinez. Itziar Pazos izan zen azkarrena. Antolakuntzak ez zuen denborarik hartu.
Sarituak
Lasterketa jokatu ondoren sari ematea izan zen. Txapeldunek txapela eta herriko produktuak jaso zituzten eta gainontzeko saritu guztiek herriko produktuak. Izaskun Beunza eta Aitor Etxeberriak jantzi zuten txapela, Pedro Ruizek eta Maialen Muñozek jaso zuten bigarren saria eta Oscar Primok eta Rebecca Peñak hirugarrena. Beteranoetan hiru mailatan eman zituzten sariak. Oscar Primok eta Ginesa Lopezek 35 urtetik 49 urte bitarteko beteranoen saria jasoa zuen, Patxi Garcesek 50 urtetik 59 urte bitartekoa –maila honetan ez zen emakumerik lehiatu– eta Joxemari Mercero unanuarrak eta Maria Zalbideak 60 urtetik gorako beteranoen saria. Bestalde, Iker Mintegik kadete onenaren saria jaso zuen eta Iker Martinezek junior onenarena.
Sakandarrei dagokienez, Izaskun Beunza eta Alberto Martinezek lehen saria jaso zuten, Raul Audikanak eta Ginesa Lopezek bigarren saria eta Sergio Garcia de Eulatek eta Mari Gwen Daviesek hirugarrena.
Bukatzeko, Osasun Martxan parte hartu zuten guztien artean Tximonena jatetxean bi pertsonendako bazkari edo afaria zozketatu zen eta Estibaliz Arkauzi egokitu zitzaion saria. Eguna borobiltzeko auzate ederra prestatu zuten Zabalartekoek.
Balorazio positiboa
Mank-eko kirol teknikari Amaia Gerrikagoitia kontentu zegoen. “”Parte hartze oso polita egon da, bai umeen aldetik –135 partaide– eta baita helduen proban ere –71 korrikalari–. Partaidetza handitu nahi dugu, batez ere Sakanako jendearena, eta Osasun Martxarekin korrika egiten hasi berri diren horiei edo beste maila batean aritu nahi dutenei bidea eman nahi izan diegu. Izan ere, askorendako 8 km agian gehiegitxo dira, baina 3 km-rekin jendea animatzen da. 35 atera dira eta gu kontentu” adierazi zuen teknikariak. Gerrikagoitiak azpimarratu zuen emakume asko lehiatu zirela, eta horren atzean “Sakanako emakumeen atletismo eskolaren eragina “ nabaritzen zela. “Balorazio oso ona egiten dugu, bai partaidetza eta Lakuntzan sortutako giroaren aldetik ere bai. Eta, jakina, hau guztia antolatzen lagundu duten guztiei, Zabalarteri, Lakuntzako Pertzari eta Lakuntzako Udalari, gure esker ona eman nahi diogu, halako jarduera batek antolaketan laguntza handia behar duelako” gaineratu zuen. Hurrengo urteko lasterketa Arakil aldean izango dela aurreratu zuen kirol teknikariak.
