Hirugarren aldiz ospatuko da bertako produktuen azoka Lakuntzan. Udalak garai bateko feriak berreskuratzea erabaki zuen 2016an. Orduko eta gaurko helburua bera da: "lehen sektoreari eta tokiko produktuei bultzada eta ikusgarritasuna ematea". Guztia prestatzen Cederna-Garalurren laguntza izan du udalak.
Igande goizean Lakuntzako plazatik pasatzen denak bertako produktuen 17 salmahai topatuko ditu. Hestekiak, gaztak, barazkiak, barazki kontserbak, pastelak eta beste izanen dituzte salgai. Horiek plazan izanen dira. Haien aldamenean, Mikel Arregi kalean, 10 artisau izanen dira. Landutako zura, jostailuak, bitxiak, zeramika, ukenduak , eztia eta beste izanen da salgai izanen dutena. Eta eskaintza bost gizarte eragileren postuekin osatuko da.
Goizetik zabalik dauden salmenta postuei beste erakargarri bat gehituko zaio eguerdian, Lakuntzako azienda erakusketa. Bisitariek behiak, ardiak, ahuntzak, pottokak, zaldiak, txakurrak eta beste ikusteko aukera izanen dute.
Azokarekin batera aurreko bi edizioetan Cava festa ospatu izan da Lakuntzan. Aurten ez da halakorik izanen, eta ez, preseski, cava gutxi edaten zelako. Udalean urtetik urtera azoka indartzea erabaki dute.
Bestalde, aurreko urteetan bezala, igandean Mikel Arregi kalea, plaza inguruan, eta erdiguneko beste kale batzuk oinezkoendako izanen dira. Beraz, autobus geltokia mankomunitate parera aldatuko da.
Egitaraua
10:00-15:30
ertako produktuen azoka.
Artisau produktuen azoka.
Brun forjarien erakustaldia
Irrati saioak zuzenean
Trikitilariak.
11:30etik aurrera Kale-animazioa Irurtzungo Iskidi taldearekin.
12:00 Azienda erakusketa.
| Bertako ekoizleak | |
| Postua | Salgaia |
| Utxama gazta | Ardi gazta |
| Isidro Arregi harategia | Txerri hestekiak |
| Postiñeneko gazta | Ardi gazta |
| Mañeko | Pastelak |
| Reyno de Navarra | Barazki kontserbak |
| Oiaralda SL | Barazkiak |
| Sojo Natura | Belar ukenduak |
| Goiuri gozotegia | Pastelak |
| Mendiola urdaiazpikoak | Urdaiazpikoak |
| Gastaka-Barbara | Pastelak |
| Erlantz | Eztia |
| Garrarte | Garrapiñatuak |
| Chocolates Navarra | Txokolatea |
| Agirre harategia | Txerri hestekiak |
| Goierriko talogileak | Taloak |
| Vialdea Gurea | Eztia |
| Uztarrotze gaztandegia | Erronkariko gazta |
| Lakuntzako azokako artisauak | |
| Artisaua | Produktua |
| Pedro Mari Olea Armendariz | Zurezko jostailuak |
| Xabier Iturrioz Garmendia | Oinetakoak |
| Tomas Mauleon | Zurezko osagarriak |
| Julio Molinuevo Boyarizo | Zurezko jostailuak |
| Jose Luis Anso Zelaieta | Ezpelezko goilarak |
| Maria Esparza | Belarritakoak / Zeramika |
| Iosu Biraka | Zurezko osagarriak |
| Noelia Ariztia | Makramea |
| Elvira Barceló | Bitxigintza |
| Otero pilotak | Larruzko pilotak |
| Eragileen postak |
| Erakundea |
| Nafarroa Oinez |
| Txingurriye |
| Altsasukoak Aske |
| Gure Esku Dago |
| Euskaraldia |
Aurretik tortilla lehiaketa
Lakuntzako Udalak tortilla txapelketa antolatu du biharko. Plazan jokatuko da gastronomia-lehiaketa, 18:00etan. Dozena bat parte-hartzailek eman dute izena, bakarka edo taldeka. Udalak lehiakide bakoitzari zortzina arrautza eta beharrezkoak dituzten patatak emanen dizkie. Udalak txapelketa egin ahal izateko mahaiak jarriko ditu, baina gainontzeko tresnak lehiakideen kontura izanen dira.
Txapelketaren arauetan jasoa dagoenez, lehiakideek euren tortillari nahi dituzten osagaiak botatzeko aukera izanen dute, plater desberdina sortzeko. Epai-mahaiak aurkeztutako tortillen zaporea, sukaldarien sormena eta aurkezpena izanen ditu kontuan. Epaileek euren lana despeditzean tortillak ikusleen dastatzeko emanen dira.