Uztailaren 13an mustu zen afizionatuen mailako Lehendakari Txapelketa, Eibarren jokatutako Arratera Igoerarekin (137 km). Lasterketa oso lehiatua izan zen, eta oso azkarra. Jan Castellonek (Rural Kutxa-Alea) lortu zuen garaipena, Arratera bakarrik iritsita (3:17:40) eta Finisher taldeko Nil Gimenori 24 segundo aterata (3:18:04). Finisher taldeko Aimar Tadeo lakuntzarrak lan bikaina egin zuen eta bosgarren sailkatu zen (3:18:10). Aurki Italian jokatuko duen Giro della Valla d´Aosta proba garrantzitsurako bikain etorriko zaio.
Gainontzeko sakandarrei dagokienez, Jon Gil (Supermercados Froiz) hamabosgarren sailkatu zen, Ailetz Lasa (Telcom) 36., Martxel Etxeberria (Rural Kutxa-Alea) 90., Iker Agudelo (Hostal Latorre) 115., eta Aitor Ondarra (Hostal Latorre) 117. Taldeka, Rural Kutxa-Alea sakandarra izan zen onena.
Lasa, ongi Antzuolan
Hurrengo egunean, uztailaren 14an, Antzuolako Saria-Lete Oroimenezkoa jokatu zen, Lehendakari Txapelketarako baliagarria zen 123 km-ko proba. Lasterketa esprintean erabaki zuten Rural Kutxa-Aleako bi txirrindularik, eta Iker Perez izan zen lehena Alex Diaz taldekidearen aurretik (2:56:29). Ailetz Lasa hamaikagarren sartu zen (3:00:38), Martxel Etxeberria 24., eta Jon Gil 25. Taldeka, atzera ere, garaipena lortu zuen Rural Kutxa-Aleak.
