Ingurumen Departamentura jo
du Cementos Portland Valderrivas
(CPV) enpresak. Olatzagutiko porlandegian
biomasa (baso lanetako
hondakinak) erretzeko Ingurumen
Baimen Bateratuan (IBB)
aldaketa txiki bat egitea eskatu du.
Enpresatik azaldu digutenez,
"ez da ingurumen baimen ikerketarik
egin behar. Aldaketa esanguratsua
da baina ez funtsezkoa,
pet cokerako egun ditugun emisio
mailetan sartzen delako". Porlandegiko
giza baliabideetarako arduradun
Pablo Isturizek azaldu digunez,
"udalari jakinarazi genion
moduan, biomasa hasiera besterik
ez da, baina ez da nahikoa".
Isturizek azaldu duenez, biomasak
egun kontsumitzen den pet cokearen
%3 edo %4 ordezkatuko luke.
"Hori ez da nahikoa". Isturizek
jakinarazi digunez, "ondoren
IBB berri bat eskatu behar da,
hondakinetatik sortutako erregai
alternatibo zabalagoak hartuko
dituena". Horretarako ingurumen
eragin ikerketa egin beharko
litzateke.
Bideragarritasuna
Porlandegian argi dute: "hondakinak
balioztatu beharra dugu
lantegia bideragarria izateko, bestela
etorkizuna ez dugu bermatuta".
Porlandegiko zuzendaritzak
"kontsentsua" bilatu duela adierazi
du, baina "bi urte emaitzik
gabeko gestioak egin ondoren,
akordiorako aukerak agortu dira.
Gure bidea egin behar dugu".
CPV taldearen eta haren matriza
den FCC multinazionalaren ildo
estrategikoa balorizazioa da. Ingurumen
eta ekonomia argudioak
ematen dituzte horretarako. Ekonomiari
dagokionez, porlandegitik
esan digute pet cokearen prezioaren
menpekotasun txikiagoa lukeela
beste hondakin batzuk erregai
gisa erabiliz (100 €/tona gaur egun,
baina etorkizunean aurreikusten
da 150€/tona).Bestalde, klima aldaketaren
aurka borroka egin eta
CO2 isuriak murriztuko liratekeela
ziurtatu dute porlandegitik.
Gaineratu dutenez, Kiotoko itunaren
ondoren, "2013tik aurrera,
balioztapenaren bidez isuriak
murrizten ez baditugu, CO2 isurtzeko
eskubideak merkatu librean
erosi beharko ditugu, salneurri
astronomikoetan". Porlandegitik
nabarmendu dute hondakinen
balioztapena estatuan, Europan
eta Amerikako Estatu Batuetan
25 urte baino gehiagoko
ibilbidea duen jarduna dela.
Inbertsioak
Porlandegitik jakinarazi digutenez,
"merkartua motelaldian dago,
prezioek behera egin dute eta Olaztiko
egungo salmentekin ez dugu
ekoizpen gaitasunaren %50 ere
betetzen". Egun dauden porlandegiendako
merkaturik ez dagoela
ziurtatu digu Isturizek.
Gauzak horrela, CPVk iaztik
balioztapena moduko gaiekin lotutako
inbertsioak besterik ez ditu
egiten. CPVk balioztatzeko baimena
duen tokietan ari da inbertsioak
egiten. Olaztiko porlandegitik
azaldu digutenez, hala egin dute
edo egiten ari dira taldeko beste
zazpi lantegietan. "Olaztikoan ez
dago baimen bat edo ez dago inbertsio
bat bera ere programatuta".
Biomasa erretzeko azpiegituretan
inbertsioa egitea ekarriko
lukeela adierazi du Isturizek. Eta
ziurtatu duenez, "CPVk ez ditu
hondakinak kudeatuko, hornitzaileei
erosiko lizkieke". Bestetik
Isturizek nabarmendu du langile
guztien eta enpresa batzordearen
"erabateko eta baldintzarik gabeko
babesa" duela balioztapenak,
"ezagutzagatik eta, etorkizunera
begira, enplegu bermerako".