Sakanako Mankomunitateko Kirol Zerbitzuak antolatuta, asteburuan abiatzekoak ziren Sakanako Irristaketa Topaketak, Olaztin antolatutako ekitaldiarekin. Baina Mankomunitatetik adierazi digutenez, Olaztiko topaketa atzeratu da. Aurten lau herritan burutuko dira Sakanako Irristaketa Topaketak: abenduaren 1ean Altsasun, Burunda pilotalekuan; Urdiainen eta Ergoienan ilbeltzean, oraindik zehaztu gabe dauden datetan, eta asteburu honetan Olaztin jokatzekoa zena, adierazi dugun moduan atzeratu egin dena.Topaketen helburua 4 eta 15 urte arteko Sakanako irristalariak elkartzea da, ondo pasatzeko intentzioarekin. Horrela, jokoak eta probak egiten dituzte, haurrek kirola eginez arratsalde ederra pasatzeko. Bukaeran merienda izaten da guztiendako.