Sakanako Mankomunitateko Euskara Zerbitzuak ikasturte honetako matrikulazioaren datuak jaso eta aztertu ditu. Haur Hezkuntza, Lehen Hezkuntza eta Derrigorrezko Bigarren Hezkuntzan 2.756 ikasle daude Sakanan. Haietatik % 76k D ereduan egiten ditu ikasketak. % 3 B ereduan dabil eta % 21 A ereduan. Sakanako Mankomunitateak jasotako datuen arabera, batxilergoko 163 ikasleetatik 125 ari dira euskarazko ikasketak egiten eta gainontzeko 38 A ereduan. Lanbide Heziketa ikasketak euskararendako zulo beltza izaten jarraitzen dute. Ikasturte honetan matrikulatutako 68 ikasleak G ereduan ari dira ikasten, gaztelania hutsean. EhunekoakEuskara Zerbitzuak jasotako datuen arabera, Sakanan derrigorrezko hezkuntzan dauden ikasleen %76 D ereduan ari dira ikasten, %2,8 B ereduan eta %23,2 A ereduan. Mankomunitatetik azpimarratu dutenez, "Adierazgarria da A ereduaren jaitsiera: joan zen ikasturtetik 1,5 puntu egin du behera, B ereduari mesede eginez". Batxilergoan D eredua iazko datuetan mantentzen da, %76,7a.Gauzak horrela, Sakanako Mankomunitateko Euskara Zerbitzutik adierazi dute D ereduaren bilakaera "baikorra" dela, "ikasturtez ikasturte, apurka bada ere, goruntz egiten baitu. Hala ere, ez da ikusten A eredua desagertzeko joerarik. Ondorioz, azken urteotan bezala, Sakanako ikasleen % 25 inguru ikastetxetik euskaldundu-alfabetatu gabe aterako da".