Frantziako Tourrean ariko den Euskaltel Euskadiko bederatzikotea Ziordian bildu da gaur goizean, Tourrera begira taldean entrenatu ahal izateko. Tartean zeuden Gorka Verdugo eta Egoi Martinez etxarriarrak. Goizeko 10:30 inguruan entrenatzen hasi eta arratsaldeko 3:30ean despeditzea da asmoa, eta goizeko 10:15ean Gorka Verdugok adierazi digunez, "oraindik ez digute nondik ariko garen esan". Hortaz, entrenu ibilbidea bera sorpresa zen txirrindulariendako. Entrenamendua bi tandatan egitea aurreikusten zuten: lehenik karretera bizikletarekin aritu eta ondoren erlojupeko bizikletarekin. Dauphiné Liberén aritu zirenak - tartean Verdugo eta Martinez - gogorrago ariko dira aste honetan eta hurrengo astean atseden hartuko dute, uztailaren 4an Monacoko irteeran puntu gorenean egoteko.