Igandean despedituko da Espainiako Vuelta. Itzulia Gaztela Mantxan dabil igandean Madrilera sartu baino lehen, etapa luzeetan. Guaixeko erredakzioa ixterakoan atzoko emaitzen faltan, Valverdek jarraitzen zuen lider (74:27:48), Gesink 31 segundora eta Samuel Sanchez 1:10era zituela. Egoi Martinez 50.a zen, 1:08:01era; Jose Luis Arrieta 90.a, 1:47:28ra; eta Imanol Erbiti 113.a, 2:10:03ra. Sakandarrak talde lan bikaina egiten ari dira. Gaur eskalatzaileek azkeneko aukera izango dute Avila eta La Granja arteko etapan, eta biharko 27 km-ko Toledoko erlojupekoan erabakiko da igandean Madrilen nor jantziko den urre kolorez.