Urtero moduan, Euskal Herrian Euskaraz (EHE) eragileak Ezabaketa Astea antolatu du. Ekimen horrekin "bizi dugun hizkuntza zapalkuntza agerian" utzi nahi du talde euskaltzaleak. EHE-rendako "gaur egun ezinezkoa zaigu euskaraz normaltasunez bizitzea, edonon urratzen baitzaizkigu hizkuntza eskubideak". Euskaltzaleendako horren adierazle lirateke "inguruan ditugun gaztelaniazko seinaleak". Sakanako EHE-ko taldeak Euskal Herri euskalduna aldarrikatzeko txirrindula martxa antolatu du larunbaterako. "Hizkuntza eskubideen aurrean, Sakana aurrera!" lemapean tropel euskaltzalea 16:30ean Etxarri Aranaztik abiatuko da, Altsasurantz. 18:30ean Altsasun kontzentrazioa eginen da eta ondoren auzatea izanen da. Martxan parte hartu nahi dutenek 16:00etan Altsasutik Etxarrira joateko trena dute eta buelta egiteko 19:30ean dago beste bat.