Aurreko astean jakinarazi genuenez, Sakanako lau esne ekoizleren etorkizuna arriskuan egon zitekeela Capsak haien esnea biltzeari utziko ziolako. Sakanako lau esne ekoizleek, eta Nafarroako beste 42k, lasaiago pasa dute astea, astelehenean enpresa biltzaileak bere erabakian atzera egin zuela jakinaraztean. Beraz, apiriletik aurrera ere esnea biltzen jarraituko du Capsak behitegi horietan, ondoren, Central Lechera Asturianaren bidez merkaturatzeko. Nafarroako Gobernuak zabaldutako oharrean dioenez, "Nafarroako Gobernuaren bitartekaritzaren ondoren, eta Ministerioaren laguntzarekin, handizkako ekoizleak esnea biltzen jarraituko du". Bestalde, Pruden Irurtzun, Ihabarko abeltzainak Beleixe irratian azaldu du "prentsan azaldu dena besterik ez" dakitela kaltetuek. Irurtzunek gaineratu du ez dakitela "zein baldintza eta zein prezio" izanen dituzten aurrerantzean, "argitaratu den bezala, litroko 30 zentimo ordaintzen badituzte lehen baino gehiago da". Irurtzunek ez daki Capsak zergatik aldatu duen "haien esnea nahi ez izatetik, bilketarekin jarraitzera".