Sakanako Mankmunitateko Kirol
Zerbitzuak antolatutako eskalada
ikastaroa guztiz arrakastatsua izan
da. Azkenean 16 ikaslek eman zuten
izena bertan aritzeko, eta horregatik
bi monitore izan zituzten irakasle:
Jon Gurutz Lazkoz eskalatzaile
eta eskalada bide prestatzaile
arbizuarra, eta bere lagun eta
berarekin eskalada bideak prestatzen
dituen Ander Gardeazabal
bizkaitarra.
Ostiralean Sakanako Mankomunitateko
egoitzan bildu ziren
eskalada ikastaroko ikasleak, eskaladari
buruzko azalpen teoriko
praktikoak jasotzeko. 16 ikasleetatik
12 emakumeak ziren, datu aipagarria,
eta 14-15 urteko bi nerabeez
gain, gainontzekoek 25 urtetik
gora zituzten. Lazkozek eta Gardeazabalek
eskaladan erabili beharreko
materialea erakutsi zieten, arnesak
eta beste nola erabili behar diren
erakutsi, sokak nola lotu irakatsi
eta ikasleek zituzten zalantza guztiei
erantzuna eman zieten. Eta
larunbatean ikasitakoak praktikan
jartzeko garaia iritsi zen. Uharte
Arakilgo Aiztondon aritu ziren
eskalatzen, goizeko 10:00etatik
17:00etaraino. Igandean Eginoko
Lezera joateko asmoa zuten, baina
euria iragarrita zegoenez Iruñeko
Rocopolis rokodromora jo zuten.
"Oso esperientzia positiboa izan da
eta giro oso ona egon da ikastaro
guztian barna. Jendea kontentu
eta eskaladan sakontzeko gogotan
gelditu da eta beraz, balorazioa oso
positiboa izan da" adierazi du eskalada
ikastaroan parte hartu zuen
Mankomunitateko Kirol teknikari
Nerea Martinezek.