Irurtzungo foruen plazak liburu
truke azoka hartuko du
igandean. Irurtzungo eskualdeko
Gizarte Zerbitzuetako
hezitzaile Ekiñe Ramosek, Sakanako
Mankomunitateko Immigrazio
Zerbitzuko teknikari Bego Zestauk,
Itxipuru taldeko Alfredo
Prietok, Irurtzungo Atakondoa
ikastetxeko liburutegiko arduradun
Cristina de Pradosek eta guraso
elkarteko Maria Esparzak aurkeztu
zuten ekimena. Guztiek ipuinen
mundu magikoan murgiltzera
animatu dituzte kultura guztietako
Arakilgo haur eta gazteak.
Liburu-trukea
Irurtzungo Atakondoa ikastetxeko
ikasleek etxean alboratuta zituzten
liburuak eramateko aukera
izan dute aste guztian. "Giroa
berotzeko, aurretik trukearen gaia
landu zuten ikastetxean" azaldu
digu Ekiñe Ramosek. Ikastetxeko
liburutegian egin dute bilketa eta
trukean txartela jaso dute. Gaur
dute horretarako azken eguna.
Haurrendako liburuak ez-ezik,
helduendako liburuak ere izanen
dira igandeko azokan. Itxipuru
taldeak bigarren eskuko liburu bilduma
eramanen du. Kasu horretan
ez da truke-txartelik beharko.
Kultur arteko festa
Liburu truke hutsa baino gehiago
izanen da igandekoa: zenbait
hizkuntzatako liburuak eta ipuinak
ezagutu eta kultura ezberdinetako
sakandarrekin hartu-emana
izateko aukera izanen da. Zenbait
ekimen antolatu dituzte
horretarako.
Goizean zehar Sakanan presentzia
duten zenbait hizkuntzetako
idatziak ikusteko aukera izanen
da azokan. Arabiera, errusiera,
errumaniera, wolof eta serer
hizkuntzetara gerturatzeko aukera
ederra da. Sakandarrek nahi
adina galdera egin eta grafia lantzeko
aukera izanen dute. "Ekimena
jolas moduan prestatu dugu"
azaldu du Bego Zestauk.
Bestalde, eguerdiko 12:30ean,
ipuin kontalariak izanen dira herriko
liburutegi zaharrean. Hiru hizkuntzei
eginen diete lekua saioan:
arabierari, gaztelaniari eta euskarari.
Orri markatzaileak egiteko tailerra
ere izanen da. Azkenik, sorpresa
gozoak ere iragarri dituzte.
Sinergia
Irurtzungo eta bailarako bost erakunderen
artean antolatu dute
igandeko liburu azoka. Ez da elkarlanean
antolatu duten lehen ekimena.
Iaz, esaterako, Guraso elkarteak
proposatuta, bigarren eskuko
jostailuen azoka antolatu zuten.
Haren ondotik sortu zen liburu
azokaren ideia. Antolatzaileek lankidetzaren
garrantzia azpimarratu
zuten. "Irurtzunen gero eta sare
zabalagoa osatzen ari gara eta lankidetza
gero eta errazagoa da. Ia
oharkabean sortzen dira ideia
berriak" adierazi zuen Alfredo
Prietok.
Hala ere herritarren iritzia,
ideia berriak eta proposamenak
entzuteko prest daude. Igandean
liburu garbia jarriko dute azokan,
herritarren ekarpenak hartzeko.