Nafarroako Parlamentuaren
Arte Garaikidearen bilduma
kalera atera da lehen
aldiz. Artelanak ikusgai daude
ateak ireki berri dituen Tuterako
Almirante Etxean, Maria Forcada
Fundazioaren egoitzan. Nafarroako
artista ezagunen 22 obra
dira,19 margolan eta argazki eta
hiru eskultura. Horien artean daude
Jose Ramon Andaren eta Dora
Salazarren artelanak.
Erakusketak egungo Nafarroako
arte garaikidean bidaia egiteko
aukera eskaintzen du. Bidaia
horretan bi sakandarrekin eginen
dugu topo. Jose Ramon Anda
(1949) materia ezberdinen testura
eta forma lantzen aditua da. Lanketa
horren emaitza dira hiru
dimentsiotako ikurrak, figurazioa
eta abstrakzioaren eta tradizioa eta
modernitatearen arteko lanak.
Bestalde, Dora Salazarrek (1963)
eskultura espazioan egindako
marrazki gisa definitzen du. Hari
finetatik zintzilik, Ekilibristak
lanari mugikortasun eta sentsualitate
handia dario.
Erakusketak urrian ireki
zituen ateak eta ikusgai egonen da
abenduaren 30era arte.
Anda pilotari
Donostiako kubo-kutxa aretoak
Jai-Alai. Euskal Pilotaren
Edertia erakusketa hartuko du
ilbeltzaren 9ra arte. Izenak dioen
bezala, erakusketak euskal pilotaren
historian ibilaldia eginen du
artearen bidez. Gai honen inguruan
inoiz egin den erakusketa garrantzitsuenetakoa
da. Zenbait artista
ezagunek parte hartu dute erakusketan,
besteak beste, Jose
Ramon Anda bakaikuarrak.
Artista ugariren arreta eta begirada
bereganatu dituzte pilotarien
mugimenduek eta frontoien
lerro zuzenek azken bi mendeetan.
Margo-lan, argazki, eskultura
eta ikus-entzunezkoen bidez,
euskal pilotaren historian murgilduko
dira ikusleak. Erakusketak
aro historiko zabala hartzen du ,
Amerikako pilota-joko zaharren
aztarnetatik hasi eta jokoaren
gaur egungo azken irudikapenetaraino.