Igandean hasiko da Nafarroako
Euskal Kantu Txapelketa.
Etxarri Aranazko kultur
etxeak hartuko du lehenengo
kanporaketa. Bertan izanen da
zenbait sakandar.
1. kanporaketa
Beste behin ere, Euskal kantu txapelketan
parte hartuko du Altsasuko
Iaioak taldeak. Maite Gonzalezek
(baxua), Loitzune Berastegik
(trikitia), Endika Jakak (bateria),
Olatz Monrealek, Alazne Gineak
eta Ainhoa Ramirez de Aldak (gitarra
eta ahotsa) osatzen dute taldea.
Altsasuarrek bi kantu eskainiko
dituzte: Etzakit taldearen Txikita
eta The Cramberries talde irlandarraren
abestian oinarritutako
Ametsak. "Ez da erraza letra originala
itzuli eta melodian txertatzea,
baina altsasuarrek primeran
egiten dute" aurreratu digu
Kantuzale Elkarteko Juan Velezek.
Sortzez altsasuarra den Iker Diazek
ere igandeko kanporaketan
parte hartuko du.
Sakandarrekin lehian ariko
dira Nafarroako zenbait herritako
bakarlariak, bikoteak eta taldeak,
Aurizperritik Tuteraraino.
"Errealitate aski ezberdinak izan
arren, euskarak eta kantu zaletasunak
bilduko ditu guztiak" dio
Juan Velezek.
Bestalde, txapelketatik kanpo,
beste bi sakandar igoko dira oholtza
gainera, Aintzane eta Jaione
Diaz ahizpak.
Euskal Kantu Txapelketa
Euskal Kantuzaleen Elkarteak
antolatzen du Euskal Kantu Txapelketa,
"euskal kantagintza zabaltzeko
helburuarekin". Horrekin
batera, kantari berriak plazaratu
nahi dira.
Igandean jokatuko da lehen kanporaketa
Etxarrin. Datorren astean
jarraipena izanen du txapelketak
Artika Berrian. Finala azaroaren
20an izanen da, Elizondon.