Estreinakoan izandako arrakasta
ikusita, Sakanako Mankomunitateko
Immigrazio Zerbitzuak
bigarren urtez Munduko Pintxoak
egitasmoa prestatu du. Hala,
zazpi herrietako 14 tabernatan,
bihar eta etzi, goiz eta arratsaldez,
kultura ezberdinetako gastronomiaz
gozatzeko aukera izanen da.
Beti ere, tamaina txikiko gutiziak.
Taberna bakoitzak pintxo bat baino
gehiago eskainiko ditu, beheko
taulan bakarra agertzen bada
ere.
Begoña Zestau Baraibar immigrazio
teknikariak azaldu duenez,
ekimen honekin "kultura
ezberdinetako pertsonen arteko
harremana bultzatu nahi dugu".
Horrekin batera, ibarretik atera
gabe sakandarrei munduko hainbat
txokotako gastronomia dastatzeko
aukera eskaini nahi zaie.
Azken finean, "kultura anitzen
ikur ezberdinak sakandarrei hurbiltzea".
Ekimenak iaz oihartzun aparta
izan zuen eta horrek ekarri du
taberna parte-hartzaileen kopurua
ia bikoiztea. Iaz parte hartu
zuten tabernek berriz iazko
sakandar berriekin batera prestatuko
dituzte pintxoak. Sakandar
berririk ezagutzen ez zuten tabernek
Immigrazio Zerbitzuaren
laguntza izan dute, eta hala parte
hartu ahal izanen dute Munduko
Pintxoak ekimenean.
Eskaintza gastronomikoa tokian
tokiko edari edota musikaz lagunduta
joanen da. Zestauk sakandarrak
gonbidatu ditu "kultura anitzak,
zein munduko bazter ezberdinetako
pertsonen bidez haien
kulturen ikurrak (sukaldaritzaren
bidez oraingoan) ezagutzeko
aukera erraz bezain gustagarria"
aprobetxatzera.