Azarotik abendura 29 langabe gehiagok eman dute izena Nafarroako Enplegu Zerbitzuan. Hala, urtea 1.864 langaberekin despeditu dugu. Haietatik 940 gizonezkoak dira (%50,43) eta 924 emakumezkoak (%49,57). Agorriletik etengabe igo da langabezia Sakanan. Adinari dagokionez, langabe gehienek 25 eta 44 urte artean dituzte, 906 (%48,61). 45 urte baino gehiago dituzten langabe sakandarrak 752 dira (%40,34). Lan eske dauden 25 urtetik beherakoak, azkenik, 206 dira (%11,05).Sektoreei erreparatuta langabeen erdiak zerbitzuetan lan egin nahiko luke (934). Eskaera gehien dituen bigarren sektorea industria da, 646 (%34,66). Atzetik datoz eraikuntza (%7,73, 144) eta abeltzaintza (%1,82, 34). Bestalde, aurretik lanik egin ez eta lan bila dabiltzanak 106 sakandar dira (%5,69).