Martxoaren 8an, Emakumearen eguna, Sakanako Bilgune Feministak eta Altsasuko Feministak manifestazioa egin zuten Altsasun. Sistema kapitalista patriarkala egoera sozioekonomikoan atzera pausuak eragin dituela salatu zuten feministak; hortaz, emakumeak krisi ekonomikoan ematen diren murrizketa eta eskubide urraketen eragin zuzena jasotzen dutela kritikatu zuten. Herritarren artean beldurra sortarazten du sistema kapitalista patriarkalak sortutako krisiak; dena dela, feministek argi dute zein den irtenbidea: "beldurrari aurre egiteko bakarrik ez sentitzea eta elkartzea eta kolektiboki lana egitea da helburua". Krisi ekonomikoak gizon eta emakumeen arteko berdintasunak gainditzeko atzerapausoak ekarri dituela gogorarazi zuten: indarkeria sexista ekiditeko baliabideen murrizketa, besteak beste. Eredu alternatiboa martxan jartzeko gonbitea luzatu zuten feministak.