Urdalurko uraz ibarreko ahalik eta herri gehienen hornidura bermatzeko sarea zabaltzeko egitasmoa martxan du Sakanako Mankomunitateak. Aurreko urtean sarea Lakuntzatik eta Ihabarrera luzatzeko lanak eman zituen Mank-ek. Eguraldiagatik lan horiek behar baino gehiago luzatu dira eta garagarrilaren 25ean despeditu ziren. Hala ere, Mank-ek Construcciones Legarra Lazkoz enpresari azken lan txiki batzuk egiteko eskatuko dio. Lanek 1.021.047 euroko aurrekontua izan dute (895.000 euro Nafarroako Gobernuak eta 126.047 euro Mank-ek). Urdalurko ura Irurtzunera eraman ahal izateko beste 7 bat kilometro luzatu behar da sarea. 1,5 milioi euro inguruko inbertsioa litzateke. Baina Mank-ek ezin du halako lanik bere bizkar hartu Nafarroako Gobernuaren diru-laguntzarik gabe. Foru administrazioak tokiko inbertsioen azken lau urteko plana luzatu egin du eta deialdi berria egin arte Mank-ek ezin du azken zati horretako lanetarako diru-laguntzarik eskatu.