Aberastasun horretaz jabeturik, Sakanako Mankomunitateko Immigrazio Zerbitzuak kultur arteko I. Aste gastronomikoa antolatu zuen joan zen hilean Altsasun. Portugal, Maroko, Senegal, Peru, Ekuador eta Sakanako 25 lagunek bat egin zuten bertan, herrialde bakoitzeko jakiak prestatzen ikasteko. Munduko zapore ezberdinekin gozatzeko aukera paregabea izan zen. Koadernoa eta arkatza eskuan, adi-adi egon ginen gu, sekretu guztiak zuei kontatzeko prest. Hizkuntza festa ederra izan genuen hiru egunetan: portugalera, arabiera, bereberra, wolofa, gaztelera, euskara... Kultura aberastasunaren adierazle dira hizkuntzak eta, nola ez, baita bakoitzak bere herrialdetik ekarritako errezeta gozoak ere. Jatorriko herrialdetik urrun egonagatik ere, gogotsu gordetzen dituzte familian jasotako ohiturak. Portugalgo Fatimak esaterako, argi asko zuen, "nire etxean ez dago Portugalgo ogirik gabeko bazkaririk". Batzuetan ez dute erraza, haien jakietan beharrezko diren espezie edo osagaiak falta zaizkie eta. Baina Iruñea edo Gasteizera buelta eginda edo familiak bidalita, ongi moldatzen dira normalean, "are gehiago Altsasun harategi musulmana ireki dutenetik". Jatorriko platerak faltan bota arren, argi zuten beste hau ere: "Primeran jaten da hemen eta oso produktu onak dituzue gainera!". Fatima eta Munia, Falu eta Cheikh, Diomar eta Sara eta gainerakoak haien herrialdeetako jakiak erakusteko prest joan ziren ikastarora; erakutsi eta ikasteko prest, egun batean irakasle zena, hurrengoan ikasle baitzen. Errezetak erakutsi bai, baina ondokoen ohitura edo gustuak ere kontuan hartu zituzten, eta haien arabera egokitu zituzten platerak: txerriki gabeko ogia ere eginez, pikanterik gabeko platera eginez... Ikastaroan ikasitakoarekin goi mailako menua prestatu dugu zuendako. Gustuko platerak bere horretan egin edo batetik eta bestetik ideiak hartzeko, hemen dituzue errezetak. On egin!Lorategi entsalada (Maroko)Osagaiak: Aza edo letxuga txikia; kikara erdi arroz; patata 1; ondoko barazkietatik 250 gr.-na: azenarioa, leka, arto gozoa, kalabazina, ilarrak, entsaladako tomatea eta erremolatxa.Saltsarendako: maionesa, erromero pixka bat, gatza, piperbeltza, ozpina, limoiaren zukua, esne pixka bat eta oliba olioa. Prestaketa: Barazkiak ontzi ezberdinetan egosi, koloreak nahas ez daitezen. Ondoren ongi txikitu. Hozten utzi.Saltsaren osagai guztiak ongi nahasi. Aurkezpena: Plater zabal batean letxuga edo aza hostoak zabaldu. Haietako bakoitzean entsaladaren osagai bana jarri neurri berdineko multzo txikietan. Jateko orduan bakoitzak gustuko dituen osagaiak hartuko ditu bere platerean eta saltsarekin bustiko ditu. Papa a la haguancaina (Peru)Osagaiak: Kilo 1 patata; 2 arrontza; letxuga; oliba berdeak; kikara laurden esne; gaileta batzuk; 150 gr. gazta fresko; gatz pixka bat; kikara erdi olio; piperbeltza eta aji horia*.*Peruko piper mina. Plater minak gustuko ez dituenak osagai hau kendu dezake. Prestaketa: Ajiari haziak eta hariak kendu horrenbeste pikatu ez dezan. Egosi ondoren, azala kendu. Ontzi batean ajia, esnea, gailetak, gazta, piperbeltza, gatz pixka bat eta olioa nahastu eta irabiatu. Krema arintzea behar bada, esne gehiago gehitu. Arrontzak eta patata egosi eta azala kendu. Hozten utzi. Aurkezpena:Plater handi batean letxugaren hostoak zabaldu osorik eta saltsa gainetik bota. Honi patata eta arrontza egosiak gehitu, erditik zatituta. Olibekin apaindu. Cebiche al camaron (Ekuador)Osagaiak: Kg 1 ganba edo otarrainska; entsaladarako 4 tomate; 2 tipula ertain; 4 limoi; martorri edo zilantro apur bat; gatza; olioa; chile edo ajia*; platano arra; choclo edo arto samurra. *Aukeran. Mina gustuko dutenendako gomendagarria, limoiaren garraztasuna hiltzeko. Prestaketa:Ganbak zuritu eta 5 minutuz egosi gatz apur batekin. Ondoren plater lau batean zabaldu. Tipula juliana erara moztu eta ganbei gehitu. Ondoren, tomatea, martorri edo zilantroa, limoi zukua eta gatza gehitu (gazi samarrak egon behar dute). Limoien zukua otarrainsken gainera bota zuzenean. Busti egin behar dira, baina putzua egin gabe. Zuku honetan ez denbora gehiegi eduki, bestela ganbak gehiegi egiten dira eta. Chifle edo platanoa eta chulpi edo artoa frijitu. Platera apaintzeko, entsaladari chifle edo platano xerratua eta chulpi edo arto frijitua gehitu. Folares de choriço (Portugal)Osagaiak: 500 gr. irina; 3 arrontza; koilara bat gurin; koilara bat legami edo lebadura; gatz pixka bat; kikara bat olio; txorizo gozoa eta hirugiharra. Prestaketa: Ontzi batean arrontzak irabiatu.Irina, legamia, gurina eta gatza nahastu. Masari arrontza irabiatuak gehitu eta oratu, tarteka olio apur bat gehituz. Arrabola edo rodilloarekin edo oreagailuarekin ongi nahasi, bikorrik gabe geratu arte. Masa atsedenean utzi. Masak hartzitzeari utzi dionean, zabaldu eta zatitu. Zati bakoitzaren barruan txorizo eta hirugihar zatiak sartu eta masarekin estali, pilota modukoak eginez. Ordu betez labean egin, 220º-ra. Yassa oilaskoa (Senegal)Osagaiak: Oilasko bat; 2 tipula; 2 baratxuri hortz; 3 limoiren zukua; 2 koilarakada pipermin ehoa; oliba olioa; gatza; piperbeltza; arrozaPrestaketa: Tipula txiki-txiki egin eta piperbeltzarekin nahasi. Eltze batean gorritzen jarri. Bestalde, pipermina, baratxuriak eta limoi zukua nahasi.Oilaskoa eta nahasketa eltzera bota eta 45 minutuz su eztian egosi.Oilaskoa arroz zuriaren gainean aurkeztuko da.