Maitatzea

Olga Martinez Rodriguez 2009ko mar. 6a, 00:00

Anthony de Mellok Una llamada al amor liburuan, maitasunaz ari dela, zera dio: "Maitasuna ezagutza kontzientetik sortzen da. Pertsona bat orain eta hemen den bezala ikusteko gai zaren neurrian maitatu ahal izanen duzu benetan pertsona hori; aitzitik, zure memorian, zure desioan, zure irudimenean edo zure proiekzioan den bezala ikusiz gero, ez duzu  pertsona maitatuko, baizik eta harengandik sortu duzun ideia, edo pertsona zure desiraren objektu gisa, baina ez bera den bezala. Horregatik, maitasunezko lehen egitekoa da pertsona edo objektu hori, errealitate hori, benetan den bezala ikustea. Horrek ahalegin handia exijitzen du zure desirez, zure aurreiritziez, zure oroitzapenez, zure proiekzioez, zure begiratzeko era selektiboaz askatzeko ".Eredugarria!Gure burmuina laurehun mila milioi informazio bit prozesatzen ditu, segundoko, baina 2.000 bit-ez besterik ez gara jabetzen. Horrek esan nahi du errealitatea burmuinean etengabe sortzen dela. Beraz, pertsonak diren bezala ikusten ditugu? Edo, haietan ikusteko gai garena ikusten dugu soilik, hau da, gutaz ezagutzen dugun partea besterik ez? Horregatik da hain garrantzitsua nork bere bura ezagutzea. Nitaz gehiago ezagutzen dudanean eta dakidanean zu ikusteko trebeagoa naiz, eta ondorioz, gutxiago epaituko zaitut eta zutaz gutxiago pentsatuko dut gaizki. Nire burua gezurtitzat badut, adibidez, gezurretan harrapatzen zaitudanean zurekin errukiorra eta onbera izanen naiz, ezagutzen dudan nire zati hori zugan ikusiko dudalako. Hortik nire burua maitatzearen garrantzia. Zenbat eta nire zati gehiago ezagutu, onartu, integratu eta maitatu, orduan eta trebeagoa izanen naiz zurekin gauza bera egiteko. Eta gaitasun gehiago izanen dut zu, maiuskulekin MAITATZEKO. Ez zarelako jada nire bizitzan nire hutsuneak betetzeko egonen (erlazioez orokorrean ari naiz, ez soilik bikoteena), baizik eta partekatzeko, gozatzeko, eta gure baitan elkarrekin hazten segitzeko. Guztion artean mundua aldatu dezakegu eta toki ederragoa eta kuttunagoa egin! Garaiz gabiltza! Aurrera! Batu gaitezen!