Bigarren hilabetez segidan langabezia igo egin da Sakanan. Abenduan eta ilbeltzean 103 izan dira enplegu bulegoan izena eman duten sakandarrak. Ibarrean Nafarroako langabetuen %3,39 dugu, herrialdearen populazioaren %3,22 garenean.
Generoari erreparatuta antzeko kopuruak badira ere, emakumezkoak dira lan bila dauden gehienak, 932 (%51,78, 60 gehiago). Gizonezko langabetuak ilbeltza akaberan 868 ziren (%48,22, 30 gutxiago). Adinari dagokionez, lan bila ari ziren gehienak 25 eta 44 urte artean dituzte, 829 (%46,06, 20 gehiago). Enplegu bulegoan izena emanda dauden 45 urtetik gorako 803 sakandar zeuden urte akaberan (%44,61, 12 gehiago). 25 urte baino gazteago diren 168 sakandar daude azkenik (%9,33, 2 gutxiago).
Sektoreei dagokienez, 1.006 langabe dira zerbitzuetan lan egin nahi luketenak (%55,89, 43 gehiago). 523 langabeen (%29,06, 8 gutxiago) industrian ariko lirateke. Eraikuntzan, berriz, 141 (%7,83, 1 gehiago). Lehen sektorerako 34 eskaera daude (%1,89, 2 gehiago). Azkenik, aurretik lanik egin ez eta lan bila dabiltzanak 96 dira (%5,33, 8 gutxiago).
Langabezia udalerrika. Ilbeltza
Udalerria Guztira Aldea
Altsasu 870 6
Arakil 70 4
Arbizu 80 11
Arruazu 2 -1
Bakaiku 19 4
Ergoiena 9 1
Etxarri Aranatz 172 -2
Irañeta 11 1
Irurtzun 199 8
Iturmendi 22 0
Lakuntza 79 -3
Olatzagutia 139 3
Uharte Arakil 61 1
Urdiain 33 -5
Ziordia 28 0
Guztira 1.800 30
Urte akaberan prestazioak jasotzen zutenen kopuruak Altsasuko bulegoan
Ordaindutakoaren araberako prestazioa 502
Langabezia-sorospena 303
Gizarteratzeko errenta aktiboa 33
Guztira 838
Abendu akaberan langabeen %53,9k jasotzen zuten prestazioren bat. 715 pertsona (%46,03) ez zuten prestaziorik jasotzen. Horiei Iruñeko zabalguneko bulegora joaten diren arakildarrak eta irurtzundarrak gehitu beharko litzaieke Sakanako datu zehatza izateko.