Etxarri Aranazko eta Altsasuko bertso eskolek elkarrekin despedituko dute ikasturtea gaur. Saioa bertso-eskoletako lagun eta ingurukoendako bada ere, bertsozale guztiei irekia dago. Etxarri Aranazko bertso eskolan bat-batean trebatzeko lauzpabost ikasle aritu dira: Nafarroako txapelketan aritutako Joseba Beltza, Eneko Lazkoz eta Joxema Leitza eta Barañaingo kopla lehiaketan bigarren saria lortu zuen Saats Karasatorre. Gainera, Unai Artiedak, Alain Iriartek eta Jon Arratibelek lagun-artean kantatzeko aukera izan dute.
Altsasuko bertso eskolan, berriz, bat-batekotasunera salto egin dute bost ikaslek: Aitziber Gradosek, Amets Artiedak, Ekain Alegrek, Haritz Goikoetxeak eta Idoia Granizok. Ekain eta Idoia Nafarroako bat-bateko sariketan aritu ziren lan polita eginez.
Gaur, 20:00etan, Altsasuko Gure etxean eskainiko dute saioa. Ondoren auzatea izanen da.