Udalek euren energia diagnosia eskutan dute

Udal ordezkariak asteazkenean jaso zuten diagnosiak.

Sakanako Plangintza Energetikoa helburua dela, ibarreko 15 udalen eraikin eta azpiegitura publikoen kontsumo elektriko eta termikoen azterketa egin da.

Sakanako Garapen Agentziak (SGA) kudeatuta Acimuth enpresak egin du azterketa egin du. Eta horren berri aurkeztu zien atzo udal arduradunei. SGAko Aintzane Iriberri Berrostegietak azaldu digunez, “diagnosiaren bidez udal bakoitzak zenbat energia kontsumitzen duen eta horrek duen kostua azaltzen da. Kontsumo puntuen lehentasunak ezartzen ditu eta energia auditoretza sakonagoak egiteko bide ematen du”. Iriberrik gaineratu duenez, “helburua Sakanako Plangintza Energetikoa da, Sakana 2020 Plan Estrategikoan jasoa dagoena”. Europako Toki Garapenerako Programako diru-laguntza baliatuz egin du SGAk energia diagnosia.

Diagnosian zenbat kontsumitzen den aztertu da, ez nola kontsumitzen den. Hurrengo pausuak energia auditoritza zehatzagoak egitea izanen litzateke. Diagnosiak emandako lehentasun puntutan hasiko dira auditoritza horiek egiten. Izan ere, gaur egun udal bakoitzak energia planak dituzte, batzuk besteak baino garatuagoak, baina energia plangintza orokorrik ez dago. Udal guztiek energia arloan jarraituko luketen estrategia bat sortu nahi da, “herri bakoitzaren berezitasunak mantenduz” zehaztu du Iriberrik.

Ondorioak
SGAko kideak esan digunez, egindako energia diagnosiaren epe motzeko ondorioa izanen da energia gastuaren murrizketa, “dela kontratatutako potentzia doituz (20.000 euroko aurreztea) edo komertzializatzailea aldatuz (43.000 eurokoa)”. Epe luzeko ondorioa da Sakanako Energia Plangintzaren oinarria izanen dela. Hainbat jarduera aurreikus daitezkeela esan digu Iriberrik: “energia auditoretzen beharra neurtu, energia arloan, udal langileei prestakuntza eskaini, bateratutako energia erosketa proiektuak sustatzea, energia berriztagarrietako proiektuen bideragarritasuna aztertzea, sentsibilizazio kanpainak egitea eta abar”.

Diagnosiak erakutsi duenez, orokorrean udalek kontratatua duten potentzia behar baino handiagoa da. “Doikuntza eginda aurrezpen handiak lortu daitezke. Esaterako, kontratu batean 8.000 euroko aurrezpena egiteko aukera. Diru asko da hori udal batendako”. Udalek kontratatutako prezioetan, azpiegituretan… ezberdintasunak agerian utzi ditu energia diagnosiak eta orain, udal bakoitzari bere txostena emanda, SGAko kideak haiekin lanean ariko dira. Sakanako Energia Plangintza zehazteko bidea emanen dute harreman horiek. Etorkizunean energia eraginkortasuna hobetzeko proiektuak landuko lituzke agentziak udalekin.

Ekoizpen potentziala
Duela bi urte ibarrak duen biomasa potentziaren azterketa egin eta ustiapen plangintza garatu zen. Aurten Euskal Herriko Unibertsitateko (EHU) bi ikaslerekin bi proiektu egin dira. Hidraulika txikien (ibai bazterreko errotak) potentzialaren azterketa egin da lehenik. Iriberrik aurreratu digunez, “ez du emaitza onik eman. Zer potentziala dagoen ikusi dugu. Egungo legediak asko zailtzen dute haien errentagarritasuna. Legea aldatzen denean proiektuari heltzeko gai izanen gara”. Haize mapa ere egin dute EHUko ikasleek eta proiektu eolikoak ibarreko zein puntutan den interesgarrien garatzea zehaztu du. “Momentuz gaitasuna aztertzen ari gara, baina energia diagnostikoarekin eta industriekinn energia kudeaketa proiektuekin ere oso interesgarria da halako informazioa izatea”, esan du Iriberrik.

Energiarekiko halako kezkaren zergatiak galdetuta, agentziako kideak hainbat arrazoi aipatu ditu. Klima aldaketa lehenik. Bestetik “dugun energia pertzepzioa ez da ona, energia asko kontsumitzen dugu eta askoz ere gutxiago kontsumitu dezakegu”. Azkenik, ingurumena mantentzearen beharra nabarmendu du eta horretan “udalek eredu izan behar dute eta hezkuntza hori ibar guztira zabaldu beharra dago”.

Udalen energia kontsumoa
Udala          Elektrizitate kWh/urteko    Gas kWh/urteko    Gasolio kWh/urteko
Altsasu               1.683.328            2.113.651         43.147
Etxarri Aranatz       656.368              415.336                  0
Olatzagutia            435.849              370.799        102.850
Arbizu                   511.878              116.468        453.884
Irurtzun                442.783              344.468          89.819
Uharte Arakil         260.243              136.091                  0
Lakuntza               312.497              145.036                  0
Urdiain                  159.691                        0          74.397
Bakaiku                 114.452               13.116                  0
Iturmendi              100.861                        0           53.702
Irañeta                   67.089                         0                  0
Lizarraga*              46.727                         0                  0
Dorrao*                 29.784                         0                   0
Mank-en egoitza     20.494                 30.449                  0
Unanu*                  37.844                        0                   0
Arruazu                  20.052                        0                   0
Arakil                     84.606                        0                   0
Ergoiena                  1.919                         0             9.151
Guztira              4.986.466        3.685.444        826.949
*Kontzejuak

1.126.752 euro urteko
Hori da Sakanaren energiaren faktura publikoaren kostua (9.498.860 kWh urteko). 54,95 euro sakandarreko.

Erlazionatuak

Udalen energia diagnosia aurkeztu dute gaur

Sakana

Sakanako Diagnostiko Energetikoa aurkeztu diete udal ordezkariei gaur goizean Sakanako Mankomunitatearen egoitzan. 15 udalen eraikin eta instalakun...