Igandean Huescako Villanua herriak 2KV Collarada mendi lasterketa antolatu zuen. Proba ikusgarria zen, kilometro bertikal bikoitza, Pirinioetako paraje zoragarrietan jokatutakoa. A ibilbidean Collarada igo eta jaitsi behar zuten korrikalariek (17 km), eta B ibilbidean Collarada igo (8,5 km). 8,5 kilometroko tarte horretan 2.016 metroko desnibel positiboa zuten aurrez-aurre korrikalariek.
Collarada igo eta jaisteko proban 100 korrikalari pasatxo lehiatu ziren. David Prades (2:09:06) eta Maider Fraile (2:56:40) izan ziren azkarrenak. Aritz Munarriz etxarriarra izan zen lehen sakandarra, helmugan bederatzigarrena (2:24:35), 8. eta 7. postuetatik oso segundo eskasera. Minutu gutxira sartu zen Beñat Katarain lakuntzarra, 12. postuan (2:30:49). Collarada igotzeko proban Ferran Teixido (1:24:14) eta Miren Otzerinjauregi (1:54:49) nagusitu ziren. Iraitz Senar 32.a sailkatu zen (1:57:01).