Garila bitartean langabeziak behera egin du Sakanan, baina agorrilean joera moztu zen. Aurreko hilabetean baino 9 pertsona gehiago zeuden Nafarroako Enplegu Zerbitzuan (NEZ) izena emanda: 1.278. Joan den urteko agorrila akaberan 314 sakandar gehiago ziren lan bila zeudenak. Sakandarrak Nafarroako populazioaren %3,19 izanik ibarreko langabeak %3,06 dira.
Emakumeak dira lan bila ari diren gehienak: 731 (%57,2 eta aurreko hilean baino 8 gutxiago). Gizonezko langabetuak, berriz, 547 ziren (%42,8 eta 17 gehiago). Langabe gehienek 45 urte edo gehiago dituzte: 630 (%49,3 eta 11 gehiago). 25 eta 44 urte bitarteko langabeak dira bigarren adin multzoa: 544 (%42,57 eta 5 gutxiago). 25 urte baino gazteagoak eta lan bila dabiltzanak 104 ziren (%8,14 eta 3 gehiago).
Sektoreak
Zerbitzuetan lan eginen lukete langabe sakandarren %60,33k (771 pertsona eta aurreko hilean baino 4 gehiago). Industriarako lan eskatzaileak %25,12 ziren (321 eta 11 gehiago). Eraikuntzan lan egiteko prest zeuden %6,73 (86 sakandar eta 7 gehiago). Lehen sektorean aritzeko prest %1,8 zegoen (23 pertsona eta 7 gutxiago). Azkenik, aurretik lanik egin ez dutenen kopurua %6,03koa zen (77 eta 6 gutxiago).
Kontratuak
Oporrak kontratazio kopuruan nabaritu zien. Agorrilean garilean baino 100 kontratu gutxiago sinatu zituzten sakandarrek, 581 guztira (2014ko agorrilean baino 46 gehiago). Haietatik %57,31 gizonezkoen sinadura dute (333 eta garilean baino 29 gutxiago) eta %42,69k emakumezkoenak (248 eta 71 gutxiago). Sinatutako 10 kontratuetatik bederatzi (%93,8) aldi baterakoak ziren (545 eta aurreko hilean baino 111 gutxiago). Agorrilean mugagabe bihurtu ziren kontratuak 24 izan ziren (%4,13 eta 11 gehiago). Hasieratik mugagabeko kontratuarekin hasi ziren dozena bat sakandar (%2,07 eta berdin).
Industriak egin zituen kontratazio gehienak agorrilean: 279 (%48,02 eta garilean baino 13 gehiago). Zerbitzuen sektorean ere kontratu asko sinatu ziren: 275 (%47,33 eta 107 gutxiago). Eraikuntza sektorean 23 kontratu sinatu ziren (%3,96 eta 4 gutxiago). Azkenik, lehen sektorean 4 kontratu sortu ziren (%0,69 eta 2 gutxiago). Nafarroan agorrilean sinatu ziren 26.182 kontratuetatik %2,22 sakandarrenak ziren.
Langabezia herrika
Herria Langabeak Aldea
Arakil 33 -1
Irurtzun 133 -2
Irañeta 6 -1
Uharte Arakil 40 0
Arruazu 6 1
Lakuntza 49 -8
Arbizu 61 -1
Ergoiena 8 0
Etxarri Aranatz 138 8
Bakaiku 13 1
Iturmendi 22 0
Urdiain 25 1
Altsasu 636 12
Olatzagutia 91 -2
Ziordia 17 1
Sakana 1.278 9