Fededun ugariren topaleku bihurtuko da, atzera ere, Aralarko santutegia Aste Santuan. Fededunen etorrerari erantzuteko elizkizun egutegia ere zehaztu dute. Hala, bai Ostegun bai Ostiral Sainduan mezak 17:00etan izanen dira Aralarren. Larunbatean elizkizuna 20:00etan izanen da. Pazko egunean, igandean, 12:30ean izanen da meza nagusia. Akaberan Aralarko aingeruaren irudia gurtzeko aukera izanen da.
Aralarko aingeruak urteroko herriz herriko ibilbidea igandean abiatuko du, 16:30ean. Santutegia utzi eta oinez, Atatik barnako bidetik Baraibarrera eramanen dute. 19:00etan iritsiko da hara. Pazko astean zehar aingeruaren irudiak Larraun eta Araiz ibarrak bisitatuko ditu. Baina, hurrengo larunbatean, apirilaren 2an, Uharte Arakilera iritsiko da, 19:45ean. Aingeruaren irudia bertan dela, Oskiako ermitan meza izanen da apirilaren 3an, igandean, 12:00etan. Elizkizun horrek arakildarrak elkartuko ditu. Oskiaren ondoren, apirilaren 4an, Aralarko aingerua Iruñean sartuko da, 19:00etan. Han emanen du aste osoa, ohiko bisitak egiten.