LABek lanpostuak sortu direla gaztigatu du

Finantza sektoreak eragindako krisiak langabezia handitzea ekarri zuen. Sakanako LABeko arduradun Gaizka Uhartek esan du gaur egun duela bi urte baino hobe gaudela. “Gainera, ibarreko hainbat eragileren adostasunarekin gure etorkizuna hemen bermatuko duen garapen eredu berri baten alde lanean ari gara: Sakanako Plan Estrategikoa”. Uhartek, datuak eskutan, ibarreko ekonomiaren joera aldatzen hasi dela adierazi du. “Aurrenekoz, martxoan, kontratazio gehienak industria arloak egin ditu %55,1 (379), zerbitzuenak %41,9 izan dira (288). Industria jarduerak gora egin duenez, gizonezkoak gehiago kontratatzen dira orain. Duela urte bat emakumezkoak ziren”. Prekarietateak emakumezkoei gehiago eragiten diela adierazi du Uhartek.

“Enplegu datuak positiboak dira, baina behin behinekotasuna handia da Sakanako enpresetan eta lan munduan sartzen direnek prekarietatea bizi dute”. Kontratazio askotan legeari iruzur egiten zaiola eta, horregatik, langileen aldeko epaiak daudela gogorarazi du. LABetik langileei lan eskubideak defendatzera deitu dituzte.

Datuak
Krisiaren ondorioz gizarte segurantzan kotizatzen zuten sakandarren kopuruak (besteendako lan egiten duten langileak eta autonomoak) etengabe behera egin zuen. 2008tik 2015era %38,55 jaitsi zen kopurua 6.722tik 4.130era, 2.592 gutxiago. Esaterako, sei enpresen itxierak 900 lanpostu galtzea ekarri zuen. Joan zen urtean kotizatzaileen kopuruaren beherako joera aldatu eta handitu zen: %9,92 eta 410 kotizatzaile gehiago.

Sindikatuak emandako datuen arabera enpresetan aurten joan den urtean baino 401 langile gehiago daude lanean. Enpresa handiek enpleguaren %52,37 sortu dute, ertainek %43,89 eta txikiek  %3,74. LABetik nabarmendu dute 24 enpresek ibarreko langileen %40,59 dutela. Uhartek azaldu duenez, “enpresa horiek dira Sakanako enplegua hobetzearen arrazoia dira”.