Ikasturte berriaren hasierarekin batera Sakanako Mankomunitateko Euskara Zerbitzuak hizkuntza ereduka izandako matrikulazioaren berri eman du. D ereduak osasuntsu segitzen du aurreneko bi hizkuntza zikloetan, %80tik gorako kopurua euskaraz ari dira ikasten. Derrigorrezko Bigarren Hezkuntzan (DBH) muga horretara iristeko 2,5 puntu falta dira (bi urtetan 0,4 jaitsi da). Ikasturte berriko datuei dagokienez, apenas dago aldaketarik. A ereduak hamarren bat galdu du eta, azken hiru urteen modura, B ereduak matrikulazioaren %4ari eusten dio. Hezkuntza eta soziolinguistikako adituek askotan nabarmendu dute azken bi ereduek ez dutela euskara ikastea bermatzen.
Zikloka
Haur Hezkuntzan (HH) dauden 661 umeetatik (aurrekoan baino 8 gutxiago) %84,3k D ereduan ikasten du. Euskarazko ereduak ikasturte batean 1,3 puntu egin du behera, 557 ikaslerekin geldituz (16 ikasle gutxiago, %2,79ko jaitsiera). HHn B ereduak 1,1 gora egin du, matrikularen %7,1 izanik, 47 ikasle (aurrekoan baino 7 gehiago, %17,5eko igoera). Aurreko ikasturtean HHn A ereduan matrikulatuen kopuruak %9tik jaitsi zen. Muga horretatik behera segitzen du, baina bi hamarren gora egin du eta ikasturte berrian matrikulazioaren %8,6 gaztelaniazko ereduan da, 57 ikasle (bat gehiago, %1,75eko igoera).
Lehen Hezkuntzan (LH) euskarazko ereduak etengabe gora egiten segitzen du. Bederatzigarren urtea da goranzko joerarekin eta aurten matrikulatutako haurren %82,3 D ereduan ari da, matrikulazioa 1,1 puntu igo ondoren. Zehazki, 1.128 haur ari dira euskaraz ikasten LHn (27 gehiago, %2,45eko igoera). A ereduak ikasturte batean lau hamarren galdu ditu matrikulazioaren %13,2 eredu horretan izanik, 181 haur (3 gutxiago, %1,63ko jaitsiera). LHn, estreinakoz, B ereduko matrikulazioa %5etik jaitsi da; zazpi hamarren jaitsita %4,5ean gelditu da, 61 haur (10 gutxiago, %14,08ko jaitsiera).
DBHn D ereduak ikasturte honetan hiru hamarren jaitsiera izan du eta euskarazko eredua matrikularen %77,5 bereganatu du, 550 gazte (8 ikasle gutxiago, %1,43ko jaitsiera). A ereduan matrikulazioak hiru hamarren egin ditu gora eta %22,5 dira gaztelaniaz ikasten dutenak, 160 gazte (ikasle bat gehiago, %0,62ko igoera).
Guztira
Datu orokorrei erreparatuta, hiru hizkuntza zikloetan 2.741 ikasle ditugu ibarrean, joan den ikasturtean baino bat gutxiago. Euskara Zerbitzuak emandako datuen arabera, D ereduan ikasleen %81,5 ikasten ari dira, 2.235 ikasle; aurreko ikasturtean baino hiru gehiago. Gaztelaniazkoan, A ereduan, %14,5 daude, hamarren bat gutxiago. Aurreko ikasturtean 400 ikasleen mugatik jaitsi zen A eredua eta hortxe mantentzen da 398rekin (bat gutxiago). B ereduan, azkenik, ikasleen %4 daude, 108 hain zuzen (3 gutxiago).
| Hizkuntza ereduen bilakaera | ||||||||
| Ikasturtea | Haur Hezkuntza | Lehen Hezkuntza | DBH | |||||
| A | B | D | A | B | D | A | D | |
| % | % | % | % | % | % | % | % | |
| 1997/1998 | 126 24,1 | - - | 396 75,9 | 365 32,5 | - - | 758 67,5 | 168 35,8 | 301 64,2 |
| 2001/2002 | 111 20,9 | - - | 420 79,1 | 320 28,8 | - - | 792 71,2 | 262 38,7 | 419 61,3 |
| 2005/2006 | 97 18,2 | - - | 437 81,8 | 278 24,7 | - - | 876 75,9 | 235 34 | 456 66 |
| 2006/2007 | 98 17,5 | 16 2,9 | 445 79,6 | 272 23,3 | 14 1,2 | 883 75,5 | 216 32 | 460 68 |
| 2011/2012 | 79 11,7 | 29 4,3 | 568 84 | 200 15,8 | 89 7 | 974 77,1 | 176 24,5 | 542 75,5 |
| 2012/2013 | 85 11,6 | 34 4,6 | 616 83,8 | 201 15,9 | 67 5,3 | 995 78,8 | 178 24,2 | 557 75,8 |
| 2013/2014 | 68 9,8 | 45 6,5 | 583 83,7 | 195 15 | 65 5 | 1.039 80 | 177 23,4 | 578 76,6 |
| 2014/2015 | 69 9,9 | 41 5,9 | 585 84,2 | 184 13,9 | 69 5,2 | 1.069 80,9 | 161 22,1 | 567 77,9 |
| 2015/2016 | 56 8,4 | 40 6 | 573 85,6 | 184 13,6 | 71 5,2 | 1.101 81,2 | 159 22,2 | 558 77,8 |
| 2016/2017 | 57 8,6 | 47 7,1 | 557 84,3 | 181 13,2 | 61 4,5 | 1.128 82,3 | 160 22,5 | 550 77,5 |