Meltxor, Gaspar eta Baltasar ekialdeko erregeak bidean dira. Ilbeltzaren 5ean, ostegunean, Sakanara iritsiko dira. Errege segizioari dagokion harrera egiteko kabalkadak prestatzen ari dira ibarrean. Karga-karga egina iritsiko da segizioa Sakanara. Izan ere, erregeen morroiek txikienen gutunak jasoak izanen dituzte ordurako: Olatzagutian ilbeltzaren 1ean, igandean, 18:00etan, kultur etxean, Altsasun ilbeltzaren 3an, 19:00etan, Burunda pilotalekuan eta Lakuntzan, oraindik zehaztu ez den egunean.
Bidez okertu ez daitezen eta bidea egoki adierazteko ostegun horretan makina bat txikik faleak edo farak edo zarata ateratzeko edozer gauzarekin zarata ateratzen ariko dira. Hemen gaude adierazteko haien modua da. Eta hurrengo egunean errege eguna dela. 11:30etik aurrera hala ibiliko dira Irañetan eta Lizarragan eta arratsaldez, berriz, Etxarri Aranatzen, Iturmendin eta Altsasun. Azken horretan opilen banaketaren bidez faradunen erregea aukeratuko dute. Opilean sorpresa opatzen duenak Eneritz Regilen lekukoa hartuko du. Bera buru dela, herrian barna haur segizio zaratatsuak erregeen etorrera iragarriko du. Altsasuko ohitura hori 1974ean berreskuratu zuten Enrike Zelaiak eta Luis Mari Lopez de Goikoetxeak.
| Herria | Ordua | Tokia |
| Irurtzun | 18:30ean | Eliza |
| Uharte Arakil | 18:30ean | Manuel Goikoetxeren zurgindegitik, Zerradoa |
| Lakuntza | 18:00etan | Ibai aldetik |
| Arbizu | 18:00etan | Udaletxea |
| Ergoiena | 18:00etan | Lizarragako elkartetik. Lizarragan buelta egin ondoren, Dorraora –harrera elkartean– eta Unanura –harrera plazan– joango dira, bukaeran Lizarragako elkartean afaltzeko |
| Etxarri Aranatz | 19:00etan | Eliza |
| Bakaiku | 18:00etan | Beheko basotik |
| Iturmendi | 15:00etan | Fara-joleak plazan |
| 19:00etan | Pilaraldetik | |
| Altsasu | 17:30ean | Farejoleen errege zozketa plazan |
| 19:00etan | Kabalkada, Lanbide Heziketako Sakana Institututik | |
| Olatzagutia | 18:30ean | Autobus geltokitik |
| Ziordia | Zehaztu gabe | Texeria kalea |