Galtzak bete lan izanen ditu Olentzerok bihar. Maridomingi lagun duela Sakanara bisita eginen du, basoko txondorrak itzali eta ikatza egin ondoren. Ikazkinari behar bezalako harrerak prestatzen ari dira ibarraren luzean, eta merezitako ongi etorria eginen zaio bihar. Esaterako, bakaikuar txikienak euren txokoak apaintzeko auzolana eginen dute gaur, 17:00etatik aurrera, elkartean.
Baina, hura etorri aurretik, txikienak kalera eskatzera aterako dira bihar goizean; Uharte Arakilen eta Etxarri Aranatzen pazkuan amores eskean eta Altsasun eta Ziordian eta beste hainbatetan kantu-eskean ariko dira.
Olentzero etorri aurretik, Lamiatutur Olatzagutian izan zen igandean, olaztiar txikiek ikazkinarendako zituzten gutunak jaso zituen. Arbizuko haurrak basora joan ziren gutunak ematera. Olentzeroren postotzian gutunak utzi eta ikazkina eta Mari Domingi urrutitik ikusi zituzten Iñigo Aritza ikastolako ikasleek.
Bihar, Olentzero eta Maridomingi agurtu ondoren, makina bat herritan auzatea edo otamena izanen da. Horrela, Gabonetako ospakizunak primeran hasiko dira.
Etxeberrin eta Zuhatzun egona da ikazkina
Olentzerok lan handia duela jakina da. Horregatik, lanak aurreratzeko, aurreko asteburuan jaitsi zen Etxeberrira. Giro bikainean, primerako harrera egin zioten ikazkinari. Zuhatzuko bidea, aldiz, atzo, ostegunarekin hartu zuen ikazkinak. Zuhatzuarrek txokolate beroa hartu ondoren mendirantz jo zuten, hari harrera egiteko. Ondoren, kanta eta dantzen tartea izan zen, eta haurrek opariak jaso zituzten ikazkinaren eskuetatik.
| Herria | Ordua | Tokia |
| Irurtzun | 18:30ean | Plazaolako zubia |
| Etxarren | 18:30ean | Eliza |
| Satrustegi-Hiriberri | 17:30ean | Satrustegiko elkartean txokolatada |
| Satrustegin | 18:30ean | Olentzero Satrustegin. |
| Hiriberri | 19:30ean | Olentzero Hiriberrira eta merienda |
| Ihabar | 18:30ean | Autobia azpiko zubia |
| Irañeta | 18:00etan | Autobus geltokia |
| Uharte Arakil | 18:00etan | Itxesin, Beriaingo bide hasieran |
| Arruazu | 19:30ean | Ubeldeko zubian |
| Lakuntza | 18:00etan | Trenbide azpiko zubia |
| Arbizu | 18:00etan | Plazan bildu, trikitixarekin baso aldera abiatzeko, bertan Olentzerori harrera egiteko |
| Unanu | 18:00etan | San Donato bidetik |
| Dorrao | 18:00etan | San Pedrotik |
| Lizarraga | 18:00etan | Menditik |
| Etxarri Aranatz | 17:00etan | Aldapasoro auzoan |
| Bakaiku | 18:00etan | Zulanpetik |
| Iturmendi | 19:00etan | Atxumendi kalea |
| Urdiain | 18:00etan | Portuko kalen |
| Altsasu | 11:30ean | Mari Domingi gaztetxetik abiatuko da, Foru plazara, gaiteroekin. Ondoren, Zumalakarregira joango dira, gaitero, fanfarre, txistulari eta eskolaniakoekin |
| 17:45ean | Olentzero eta Mari Domingi San Juan baselizara iritsiko dira. Zubiaren beste aldean harrera egingo zaie | |
| 18:00etan | Ondoren ibilbideari ekingo diote. Zumalakarregin, miura banaketa, txondorra eta askaria eginen da eta gero Foru plazara (txalaparta, dantzariak, abesbatza…) | |
| Olazti | 18:30ean | Belen iturritik |
| Ziordia | Zehaztu gabe | Altzaniako bidea |