Irurtzungo euskaltzaleen topagunea, Aizpea, arduratzen da Santa Ageda koplak kantatzera ateratzeko deialdia egiteaz. Bihar, 18:30ean, plazatik abiatuko dira. Irañetan Santa Agedarekin batera inauteriak ospatzen dituztenez, gaur aterako dira koplak kantatzera. 18:30ean elkartuko dira Txapel Azpi elkartean. Baserritarrez jantzita joateko deia egin dute. Lakuntzan, bihar, 17:00etan jarri dute hitzordua, eta kantuaren erritmoa eramateko makilak eramateko gaztigatu dute. Herrian barna kantu-eskean ibiliko dira eta jasotakoarekin, akaberan, kultur etxean merendua eginen dute. Arbizun larunbatean aterako dira herria kantuz alaitzera. 18:00etan izanen da, plazatik abiatuta. Eta makila ez ahazteko deia egin dute.
Etxarri Aranazko musika eskolako ikasleak eta abesbatzako kideek ahotsak elkartuko dituzte Santa Ageda bezperan. 18:00etan plazan elkartu eta herrian barna kantari ariko dira. Akaberan txokolate-jana izanen da. Iturmendin 19:30ean elkartuko dira bihar. Plazatik abiatuko dute kantu-eskea. Baserritarrez jantzita joateko gonbidapena egin dute gazte asanbladakoek. Altsasun musika eskolatik abiatu eta herrian barna kantari ariko dira aipatu eskolako abesbatzako kideak. Fanfarrearen laguntza izanen dute. 12:30ean abiatuko dira Santa Ageda koplak kantatzera.
Igandean da Santa Ageda eguna. Ohiko kantu eskeak bezperan, bihar izanen dira.