Hezkuntza kontseilari Maria Solanak Jakin-mina programako diplomak banatu ditu gaur. Nafarroako Jauregiko Tronu Aretoan diplomak jaso dituzte 33 gaztek. Horien artean bost gazte sakandar daude: Altsasu institutuko Leire Sagarzazu Ibarguren, Eider Tiscar Lopez eta Amaia Vicente Goikoetxea-Ziordia eta Andra Mari ikastolako Iune Atxa Ganboa eta Garazi Corroza De la Cueva.
Jakin-mina zikloa Jakiundek antolatu du. Haren helburua da akademikoki motibatuta dauden gazteen adimen-garapena eta garapen pertsonala azkartzea, adituek emandako hitzaldi eta erakustaldien diziplina anitzeko programa baten bidez. DBHko ikasleei zuzenduta, haiendako Nafarroako Unibertsitate Publikoan egindako bost hitzaldiz osatu da, azaroaren 18tik martxoaren 31ra artean.
