D ereduak 0,9 puntu gora

Sakanako Mankomunitateko Euskara Zerbitzuak hizkuntza ereduka izandako matrikulazioaren berri eman du. Hezkuntza eta soziolinguistikako adituek nabarmentzen dutenez, euskarazko eredua da hizkuntza ikastea bermatzen duen bakarra. Haur Hezkuntzan (HH) D ereduko irakaskuntzak ikasleen % 85,4 hartzen du (1,1 gora). Lehen Hezkuntzan (LH) ikasleen % 82,1 ari dira euskaraz ikasten (0,2 gutxiago) eta, azkenik Derrigorrezko Bigarren Hezkuntzan (DBH) % 78,9 ari da D ereduan (1,4 gehiago).



Zikloka

Haur Hezkuntzan (HH) 632 umeetatik (aurreko ikasturtean baino 29 gutxiago) %85,4k D ereduan ikasten du, hau da, 540 ikaslek. Pasatako ikasturtearekin alderatuta euskarazko ereduak 1,1 puntu egin ditu gora, baina 17 ikasle gutxiago daude. B ereduak % 6ko matrikulazioa du, 38 ikasle (1,1eko jaitsiera eta 9 ikasle gutxiago). A ereduari dagokionez, matrikulatuen % 8,6 hartzen ditu, 54 ikasle (portzentaian aldaketarik ez eta 3 ikasle gutxiago).

Bederatzi ikasturteren ondoren Lehen Hezkuntzan euskarazko ereduak behera egin du portzentajean, 0,2 puntu, matrikulazioaren % 82,1 hartuz. Hala ere, LHn D ereduak ikasle kopuruak  gora egin du, 20 gehiagorekin 1.148ra iritsiz. A ereduan joan den urteko ikasle kopuru bera ari da, 181, baina ehunenekotan pixka bat jaitsi da % 13an gelditu (0,2 puntuko jaitsiera). B ereduan ehunekoan eta ikasle kopuruan gora egin du, %4,9 eta 68 ikasle. (0,4 puntu eta 7 ikasle gehiago). Bigarren urtez % 5etik behera gelditzen da. LHn guztira 1.397 ikasle ikasten ari dira.


D ereduak salto handia egin du DBHn: 576 ikasle ari dira euskaraz ikasten, % 78,9, hau da, 26 ikasle eta 1,4 puntu gehiago. Euskarazko eredua DBHn ikasleen % 80 hartzetik gero eta gertuago dago. Kopuru hori beheko hezkuntza mailetan aspaldi lortu da. A ereduko matrikulazioa % 21,1 da eta 154 ikasle ditu (1,4 puntu eta 6 ikasle gutxiago). Guztira 730 ikasle ari dira ziklo horretan. 



Orokorrean 

Sakanan, hiru hizkuntza zikloetan 2.759 ikasle ari dira ikasten, aurreko ikasturtean baino 18 gehiago. Euskara Zerbitzuak zabaldutako datuen arabera, D ereduan 2.264 ikasle ari dira, %82,05 (29 ikasle gehiago eta 0,55 puntu gehiago). A ereduak 389 ikasle ditu, % 14,09 (9 ikasle eta 0,41 puntu gutxiago). Azkenik, B ereduan 106 ikaslea ari dira ikasten, % 3,84 (2 ikasle gutxiago eta 0,16 puntu gutxiago).