Honela segitzen du Nafarroa Oinez 2018ko antolakuntzak gaur zabaldu duen azken oharrak:
Eguraldia lagun, milaka ikastolazale eta euskaltzale hurbildu dira Iñigo Aritza ikastolari sostengua ematera. Inklusibitatearen erronka nagusia bete da. Helburuak gainditu dira.
Iñigo Aritza Ikastolako ordezkariek 2018ko Nafarroa Oinez egunaren oso balorazio ona egin dute. Bikaina izan da eguna, eguraldi ederrarekin, eta jende andana ibilbide osoan zehar. Euskal kulturaren mota askotako adierazpenez gozateko aukera izan dute Altsasun. Aurreikuspenak bete eta gainditu egin dira. Ekintza guztiak arrakastatsuak izan dira. Antolatzaileek bereziki Haurren Hiria eta Erronka nabarmendu nahi izan dituzte.
Era berean, kontuan izanik aurtengo erronka nagusia inklusibitatearen aldeko apustua izan dela, antolatzaileak pozik agertu dira helburuak bete direlako. Helburu horren isla garbiena izan da inklusibitatearen tailerra.
Iñigo Aritza ikastolak eskerrak eman nahi dizkie gaur eta urte osoan Altsasun auzolanean aritu diren ehunka boluntarioei, eta ikastolaren proiektuari babesa ematera hurbildu diren ikastolazale eta euskaltzale guztiei.
Ezin dugu aipatu gabe utzi, egun guztian presente izan dugulako, gaur goizaldean gertatutako ezbeharrak utzi digun samina. Iñigo Aritza Ikastolako ikasle ohi eta komunitateko kide Mikel, zendu egin baita. Hala ere, egunari ahalik eta modurik egokienean aurre egin behar diogula erabaki dugu, zuei euskaldun eta euskalzaleei zor dizuegulako, eta Mikelek eta bere familiak ere hala nahiko zuketelako.