Lau urtez behera egin ondoren, populazioak gora egin du

Sakanak biztanle gehien 2013. urtean izan zuen, 20.809 pertsona hain zuzen ere. Hurrengo lau urteetan % 2,99 galdu zuen ibarrak, 2014an eta 2015ean jaitsiera handiarekin eta txikiagoa 2016an eta 2017an. Beherako joera hori joan den urtean moztu zen eta 10 sakandar gehiago zenbatu ziren urteko lehen egunean: 20.195 sakandar. Horietatik 10.366 (% 51,33) gizonezkoak dira, 2017ko kopuru bera. Emakumezko sakandarrak, berriz, 9.829 (% 48,67) dira, joan den urtean baino 10 gehiago. Udalerri guztietan gizonezko gehiago dago emakumezkoak baino.

Herrika
Sakanak 15 udalerri ditu eta haietako bederatzik populazioa handitu dute, Bakaikuk mantendu eta gainontzeko bostek galdu. Biztanle gehiago duten herrien artean, portzentajea kontuan hartuta, gehien igo dena Arruazu da % 4,95 (5 herritar gehiago). Atzetik Etxarri Aranatz heldu da (% 1,58 eta 39 herritar). 2013an eta 2014an gertu egon ondoren, Etxarri Aranatzen estreinakoz 2.500 herritarren muga gainditu du. Populazioa handitu duten herrietan hurrengoak Irurtzun (% 1,19; 26), Irañeta (% 1,15; 2), Ziordia (% 1,12; 4), Lakuntza (% 0,79; 10), Urdiain (%0,60; 4), Arbizu (% 0,45; 5) eta Arakil (%0,21; 2).

Ehunekoari erreparatuta populazioa galtzen dutenen artean jaitsiera handiena Iturmendik izan zuen, % 4,02 eta 16 pertsona gutxiago. Ergoienan ere jaitsiera nabarmena da, % 3,76, 15 ergoendar gutxiago baitaude. Uharte Arakilgo jaitsiera % 2,78koa izan da, urte batean 23 herritar galdu baititu. Olatzagutiak biztanleriaren % 1,38 galdu zuen, 21 olaztiar gutxiago. Jaitsiera horrekin Olatzagutiak 1.500 biztanleko mugatik behera kokatu da. Populazio galera txikiena Altsasuk izan zuen, % 0,16, 12 altsasuar gutxiago. Hala ere, populazioa galtzen duten herrien artean errepikatzen den bakarra Altsasu izan zen.   

Atzera begira
2018ko ilbeltzaren 1eko datuak egun bereko 2009koekin alderatzen baditugu Sakanak hamarkada batean 457 biztanle (% 2,21) galdu dituela agerian gelditzen da. Baina 15 udalerrien populazioaren  jokabidea ez da bera, hamarretan behera egin zuen eta bostetan gora. Ehunekoari erreparatuta hamarkada batean biztanle kopuruan hazkunde handiena izan duen herria Irañeta da, % 9,32 edo 15 irintar gehiago. Atzetik ditu Arbizu (% 6,04; 64), Lakuntza (% 5,56; 67), Bakaiku (% 2,07; 7) eta Etxarri Aranatz (% 1, 75; 43).

Hamar urteko tartean herritar gehien galdu duen herria Olatzagutia da, % 13,82ko galera, 240 olaztiar gutxiago. Biztanleria galera txikiagoak izan dute gainontzeko herriek: Arruazu (% 10,92; -13), Ergoiena (% 9,86; -42), Ziordia (% 9,75; -39), Iturmendi (% 4,74; -19), Uharte Arakil (%4,28; -36), Urdiain (% 4,12; -29), Altsasu (% 2,83; -216), Irurtzun (% 0,72; -16) eta Arakil (% 0,21; -3).

4.320 nafar gehiago
Aurreko bi urteetan bezala, 2018an Nafarroako populazioak gora egin zuen, 4.320 edo % 0,67 gehiago. Joan den urteko lehen eguneko datuei erreparatuta emakumezkoak 327.085 edo % 50,51 dira, aurreko urtean baino 2.522 edo % 0,78 gehiago. Gizonezkoak, berriz, 320.469 edo % 49,49 ziren, 2017an baino 1.798 edo % 0,56 gehiago. Sakandarrak Nafarroako populazioaren % 3,11 ginen 2018an. Baina Nafarroako populazioan pisua galdu du Sakanak, 2018an % 0,02 eta 2017an % 0,03.