Sakanako Mankomunitateak oposizio bidez hondakin teknikaria kontratatzeko deialdia egin zuen joan den urtean. Hautaketa prozesua despedituta Sakanako Mankomunitateak Olatz Garde Mazkiaran izendatu du hondakin teknikari lanpostua betetzeko, B mailako lanpostua. Bere egitekoen artean daude, besteak beste: ingurumenaren arloko sentsibilizazio kanpainak egitea; Nafarroako Hondakinen Partzuergoko batzorde teknikoan parte hartzea, herrietako bilguneen kalitateari buruzko kudeaketa-adierazleei jarraipena egitea; Arbizuko hondakindegiko instalazioak ikuskatzea; garbiguneak, larrialdiko etxolak eta ekarpen eremuak ikuskatzea eta Hiri Hondakinen Zerbitzuko erabiltzaileen erreklamazioen kudeaketa koordinatzea.
Beste eginkizun batzuk ere baditu hondakin teknikariak: hondakindegian sartzen diren hondakinak ikuskatzea eta bertara bota daitezkeen hondakinen gaineko zalantzei erantzuna ematea; kudeaketa eta kalitateari buruzko sistemaren dokumentazioa; hierarkiako nagusien aginduak betetzea eta Hondakin Zerbitzuko lantaldea koordinatzea; indarrean dagoen Ingurumen Baimen Integratua betetzen dela gainbegiratzea; erabiltzaileek Hiri Hondakin Solidoen gaineko Ordenantza betetzen dutela zaintzea eta Mankomunitateko organo eskudunei egindako arau hausteen berri ematea edota erabiltzaileei egindako gogobetetze inkestak koordinatzea.