Aralarko San Migelek duen erakarpen gaitasuna, atzera ere, agerian geldituko da igandean. Makina bat fededunek eta santutegiarekin lotura duten pertsonek bat eginen dute San Migel egunean. Jendearen joan-etorria azken egunetan nabaria da San Migelen bederatziurrenarekin egunero 18:00etan meza baitago. Gaur, San Migel bezpera, 12:00etan meza nagusia izanen da eta 18:00etan meza.
San Migel egunarekin jendetza joanen da santutegira, horregatik, sei elizkizun izanen dira: 09:00etan, 10:00etan, 11:00etan, 12:30ean meza nagusia, 17:00etan eta 18:00etan. Meza bakoitzaren akaberan, ohi bezala, sinestunek Aralarko aingeruaren irudia gurtzeko aukera izanen dute.