Erreferenduma ez da delitua, askatasuna! Gure erabakitzeko eskubidea defenda dezagun lelopean Gure Esku Dagok kontzentrazioak deitu du herrietako plazetan gaurko. Modu horretan protestatzera deitu du Espainiako Auzitegi Gorenak bederatzi eta hamahiru urte arteko zigorrak ezarri dizkielako buruzagi kataluniar independentistei. Sedizioa eta diru publikoa bidegabe erabiltzea egotzi die auzitegiak Oriol Junquerasi, Raul Romevari, Joaquin Forni, Jordi Turulli, Jordi Rulli, Dolors Bassari, Carme Forcadelli, Jordi Sanchezi eta Jordi Cuixarti.
Epaia horri “erantzun bateratua” ematera deitu du Gure Esku Dagok. Bere kideek esan dutenez, “larrialdi demokratiko batean gaude”. Gure Esku Dagokoek esan dutenez, mugimendu subiranista “kriminalizatzeko” ildoa hartu du estatuak, delitu larriak leporatuta. Epaia “erabat onartezina” dela nabarmendu dute; “oinarrizko eskubideak erabiltzea ezin da delitua izan demokrazian. Alderantziz, botere publikoen ardura da erabilera bermatzea”. Gaineratu dutenez, “guztionak diren eskubide eta askatasunak kriminalizatzeko ate handi bat zabaldu du epaiak”. Erabakitzeko eskubidearen defentsa egin nahi du Gure Esku Dagok gaurko mobilizazioekin.
Deitutako bilkurak
Herria Tokia Ordua
Irurtzun San Martin kalea 7, bidegurutzean 19:00etan
Lakuntza Plazan 19:30ean
Arbizu Plazan 19:30ean
Etxarri Aranatz Plazan 20:00etan
Altsasu Udaletxe parean 19:00etan